50 жуфтлик қатнашган катта тўй, Европа бўйлаб тўрт кунлик саёҳат ва тўйдан олти ой олдин нишонланган маросимлар Амбанилар оиласи ўтказган тадбирларнинг бир нечтаси эди холос. Улар Ҳиндистондаги энг бадавлат оила бўлиб, 12 июль куни уларнинг кенжа фарзанди — Анант Амбани фармацевтика компаниясининг меросхўри Радҳика Мерчантга уйланди.
Курашчи Жон Сина ҳаворанг шервани кийиб, гиламдан ўтаётганда фотограф “Ҳиндистонга хуш келибсиз!” дея хитоб қилди. Тилларанг леҳенга кийган ҳинд актрисаси Приянка Чопра Анант ва Радҳиканинг тўйига турмуш ўртоғи хонанда Ник Жонас билан келди — у хотинининг кийимига ҳамоҳанг бўлган оч пушти рангли шерванида кўриниш берди.
Болливуд юлдузи Шоҳрух Хон зайтун рангидаги либосда суратга тушди, унинг рафиқаси, продюсер ва дизайнер Гаури Хон эса ялтироқ либосда барчанинг эътиборини тортди.
Тўйда тўқ рангли миллий либос кийган актёр Санжай Датт ҳинд актрисаси Мадҳури Диксит билан бирга келди.
Машҳур актриса папарацциларни танлаган либоси билан эмас, балки ажойиб қомати билан ҳайратда қолдирди — нозик бели ва бақувват қўллари туфайли Мадҳурини яқинда 57 ёшга тўлди, деб ўйламайсиз ҳам.
Меҳмонлар рўйхатида февраль ойида жуфтликнинг тўй олдидан бўлиб ўтган тадбирида қатнашган BP нефть компаниясининг собиқ бош директори Боб Дадли ҳам бор эди. Унинг ёрқин кўк пиджаки бошқа кийимлар орасида ажралиб турди ва Дадлини анча ёш кўрсатди. Шунингдек, Халқаро футбол федерацияси президенти, қора костюм кийган Жанни Инфантино ва ҳиндча либосда Disney маликасига ўхшаб қолган рафиқаси Лина Ал Ашкар ҳам бошқалардан қолишмади.
Буюк Британия собиқ бош вазири Тони Блэр ва унинг рафиқаси Чери Блэр қора ва қизил комбинация билан уйғунликда бир-бирларининг образларини тўлдириб турди.
Яна бир машҳур жуфтлик Шаҳид Капур ва унинг рафиқаси, кинопродюсер Мира Ражпут нафақат тўй маросимига, балки Амбанилар томонидан уюштирилган тўй олди тадбирларига ҳам кўрк бағишлади.
Изоҳ (0)