Айтишларича, гўзаллик танловларида ғалаба қозониш бу — Болливуд оламига тўғридан тўғри чипта ҳисобланади. Бир қанча ҳинд актрисалари киномотографияга келишдан аввал худди шу йўлдан ўтган: Зинат Аман, Жуҳи Чавла, Сушмита Сен, Айшвария Рай, Приянка Чопра ва бошқалар. Улардан яна бири “Ҳиндистон гўзали” тожи соҳибаси, кейинчалик кино актрисаси Сону Валия эди.
Сону 1964 йил 19 февралда панжоб оиласида туғилган. Қизалоқнинг тўлиқ исми Санжит Каур Валия бўлиб, уни ота-онаси эркалаб кичик синглиси – Монуга монанд Сону деб чақиришарди. Сонунинг отаси – Сатиндер Сингх Валиа ҳинд армияси офицери, онаси Даманжит хоним эса уй бекаси бўлган.
Журналистика ва психология факультети битирувчиси Сону ўқиш у учун асосийси эмаслигини тушуниб етгач, ўзини моделликда синаб кўради ва айнан шунда Валиянинг ўзига хос қирралари очилади. Баланд бўйли, қорамағиз бу ёқимтой қиз бир қарашда ҳаммани мафтун қилади — бирин-кетин подиум ва рекламаларда кўриниш бера бошлайди.
Шубҳасиз, у 1985 йилда ўтказилган “Ҳиндистон гўзали” танлови иштирокчисига айланади — 21 ёшли Сону ҳеч бир қийинчиликларсиз орзу қилган олий соврин соҳибаси бўлади.
Шундан сўнг қизга дарҳол қизиқиш билдиришади. Режиссёр Танвир Аҳмед уни романтик драма “Тортишув” (Акаршан) фильмига бош қаҳрамон ролига таклиф қилади, аммо лойиҳа тўхтатилади ва бир неча йиллардан сўнггина экранларга чиқади.
Актрисани таниганлар уни илк дебют роли “Қасос ўти” фильмидаги образи деб ҳисоблашади, лекин Сону 1986 йилда “Шарт” жиноий триллерида Носируддин Шоҳ ва Шабаной Азми билан рол ўйнаган.
Кейин Ракеш Рошаннинг суперхити “Қасос ўти” фильмида Рекҳанинг дугонаси образида намоён бўлди. Ушбу фильмда у салбий рол ўйнаганига қарамай актриса маҳорати танқидчилар томонидан юқори баҳоланади ва Сону Filmfare’да иккинчи пландаги энг яхши аёл актриса номинациясини қўлга киритади. Сонунинг карьерасида ҳозирги кунга қадар ҳам “Қасос ўти” фильмидаги роли энг яхши хит образи бўлиб қолмоқда.
Кейинги “Буюк Худо”, “Клерк”, “Тўфан” фильмларидаги образлари омадли бўлмайди. Лекин иккинчи фильм актрисага маҳоратли режиссёр Манмохан Десай ва суперюлдуз Амитабҳ Баччан билан бирга рол ўйнаш имкониятини беради.
Сонунинг баланд бўйи уни нафақат жозибали кўрсатар, шу билан бирга бир қанча тўсиқларга ҳам сабаб бўлган. Масалан, актриса айнан бўйи сабабли маҳоратли ва таниқли актёрлар Салмон Хон, Шохруҳ Хонлар билан партнёр бўлолмаган.
90 йилларда Болливудда уч Хон — Амир, Салмон ва Шоҳрух Хонлар пайдо бўлди. Улар Амитабҳ Баччан, Дҳармендра ва Винод Кҳанна каби баланд бўйли эмасди. Бўйи 173 сантиметр бўлган Сону Валия Хонлардан анча баланд эди ва бу унинг карьерасига сезиларли таъсир кўрсатди.
У талаб юқори бўлган янги актёрлар билан жуфтликда ўйнай олмайди ва бир неча бор интервьюларда Амир ва Салмон билан ўйнаш имкониятини йўқотганидан афсусланиб гапиради. Аммо 90 йиллар бошига келиб Болливудда янги қаҳрамонлар орасида рақобат юзага келади. Масалан, Пужа Бҳатт, Равина Тандон, Маниша Койрала, Каришма Капур ва бошқа актрисалар экранларга чиқа бошлайди.
Ўша вақтга келиб у ўз жуфти Сурю Пратапа Сингхни учратади. Кинопродюсер, Америкадаги меҳмонхоналар эгаси турмуш қурганларидан кейин актрисани Америкага олиб кетади. Эр-хотин у ерда бахтли яшайди, лекин бу бахт узоққа бормайди.
2009 йил актрисанинг эри буйрак етишмовчилигидан вафот этади. Бева қолган Сону синглиси Мону, куёви Винит Шарма ва жияни билан яшаш учун Ҳиндистонга қайтади.
Айтишларича киносаноатига келган инсон уни ҳеч қачон тарк этолмас экан. Бу гапни тасдиғи сифатида Сону ҳам 2018 йилда кинога қайтади, бу сафар продюсер сифатида.
У ўз карьерасини ёқимли хотиралар билан эслайди. Ҳа бу гўзаллик маликасининг муваффақияти қисқа, аммо эсда қоларли эди. Эҳтимол, у 10 йил олдин туғилганида яъни, 80 йилларнинг эмас, 70 йиллар актрисаси бўлганида, шубҳасиз, суперюлдузга айланган бўларди.
Изоҳ (0)