Анант Амбани ва Радҳика Мерчантнинг тўйи ёзнинг энг кўп муҳокама қилинган воқеасига айланди. Маълум бўлишича, тўйни кенг миқёсда нишонлаш куёв томоннинг оилавий анъанаси ҳисобланади. Мукеш Амбанининг катта фарзандлари — Акаш ва Ишанинг ҳашаматли тўй базмлари укасиникидан қолишмаган.
Қаҳрамонларимизнинг ота-оналари Мукеш ва Нита Амбани 1985 йилда турмуш қурган, лекин улар анча вақтгача фарзандли бўлишолмайди. Олти йил ўтгач, 1991 йил 23 октябрда Мукеш ва Нитанинг эгизак фарзандлари туғилади — ўғли Акаш ва қизи Иша.
Акаш Мумбайдаги халқаро мактабда таҳсил олади, кейин эса АҚШдаги Браун университетида олий маълумотни давом эттиради — у ерда иқтисод бўйича ўқийди. 2014 йилда дипломини олгач, ўша йилиёқ оилавий бизнесга қўшилади.
2019 йил март ойида Акаш ҳиндистонлик таниқли тадбиркор Рассел Меҳтанинг қизи Шлока Меҳтага уйланади. Қайнотаси чакана савдо, оммавий ахборот воситалари, кўчмас мулк ва молиявий хизматлар соҳаларида фаолият юритувчи компанияларни ўз ичига олган оилавий конгломератнинг бошқарувчи директори эди. Ўша пайтда Меҳтанинг энг йирик иши — Ҳиндистондаги олмос бозорида етакчи ўринни эгаллаган заргарлик бизнеси бўлган.
Акаш бўлажак рафиқаси билан болалигида танишган. Иккаласи ҳам Мумбайдаги битта мактабда ўқиган. Ўрта таълимни тугатгандан сўнг, Меҳта Принстон университетида ўқишни давом эттиради, у эрда антропология бўйича ўқийди, сўнгра Лондон Иқтисодиёт мактабида ҳуқуқ ва антропология бўйича магистрлик даражасини олади. Амбани ўқув йилининг сўнгги кунида севгилисига турмуш қуришни таклиф қилади. Никоҳ 2018 йилнинг март ойида Гоада келин ва куёвнинг оила аъзолари иштирокида бўлиб ўтган.
Бир йил ўтгач, асосий тўй маросими Мумбайдаги Жио World Centerъда бўлиб ўтади. Меҳмонлар залга гуллаган япон сакураси билан безатилган улкан аркалар орқали киришади, бутун майдон гулларга кўмилган ва марказда Кришнанинг улкан ҳайкали турарди. Тўй харажатлари ошкор этилмаган, аммо дабдабага кўра, Мукеш Амбани катта ўғлидан пул аямаган, деб айтиш мумкин.
Тўйда Болливуд юлдузлари, жумладан Приянка Чопра ва Айшваря Рай, жаҳон етакчилари, жумладан, Буюк Британия собиқ бош вазири Тони Блер ва унинг рафиқаси Чери Блер, Google бош директори Сундар Пичай ва унинг рафиқаси ҳамда Netflix асосчиси Рид Хестингс кўриниш беради. Ўша оқшом Крис Мартин барчани қўшиқлари билан хушнуд этади.
Бир йил олдин, 2013 йилда эса Йел университетини психология ва Жанубий Осиёшунослик йўналиши бўйича тамомлаган Ишанинг тўйи бўлиб ўтганди. Унинг турмуш ўртоғи миллиардер Ажай Пирамалнинг ўғли Ананд эди. Бу жуфтлик ҳам бир-бирини болаликдан таниган, аммо улар фақат 2016 йилда учраша бошлаган. Икки йил ўтгач, Ананд турмуш қуришни таклиф қилади. Тўй маросимлари деярли бир ҳафта давом этади ва турли жойларда бўлиб ўтади: Удайпур, Италиянинг Комо кўли ва Мумбай. Миш-мишларга кўра, мазкур дабдабали тўй 100 миллион долларга тушган.
Тўй оқшомида Бейонсе меҳмонлар, жумладан Ник Жонас ва Приянка Чопра ва Ҳиллари Клинтонлар олдида чиқиш қилади.
Тўрт йилдан сўнг, 2022 йил 19 ноябрда Иша ва Ананд эгизаклар — Кришна ва Аадиянинг ота-онаси бўлишади.
Изоҳ (0)