Болливуднинг таниқли актёри Саиф Али Хон 16 январга ўтар кечаси ўз уйида босқинчи томонидан пичоқлангандан сўнг, жиддий операцияни бошидан ўтказди. Ҳозирда актёр хавфдан холи. Бу ҳақда BBC нашри хабар берди.
Актёрга бўлган ҳужум Ҳиндистоннинг Мумбай шаҳрида, Хон оиласи яшайдиган хонадонда содир бўлган. Шаҳар полицияси маълум қилишича, актёр ярим кечаси унинг уйига кирган номаълум шахс билан тўқнашув натижасида яраланган. Ўғриликка кирган, деб тахмин қилинаётган босқинчи актёрнинг бўйин ва умуртқа поғонаси қисмига 6 марта пичоқ санчиган. Полиция ушбу ҳодисани текшириш учун махсус гуруҳлар тузди.
“Саиф Али Хон операциядан муваффақиятли ўтди ва ҳозирда унинг ҳаёти хавфдан холи. У соғайиш жараёнида, шифокорлар унинг аҳволини кузатиб бормоқда”, дейилади Хон жамоасининг баёнотида.
Операциядан сўнг журналистлар олдида сўзга чиққан Лилавати шифохонаси шифокори Нитин Данге, актёр “умуртқа поғонасига санчилган пичоқ туфайли орқа миянинг кўкрак қисмида жиддий жароҳат олганини” айтди.
“Пичоқни олиб ташлаш ва орқа мия суюқлиги оқишини тўхтатиш учун операция ўтказилди. Унинг чап қўлидаги ва бўйнидаги яна иккита чуқур жароҳат пластик жарроҳлар гуруҳи томонидан даволанди”, деди у.
Ҳужум ҳақида тўлиқ тафсилотлар ҳали номаълум.
Саиф Али Хон Болливуднинг яна бир таниқли юлдузи — Карина Капур билан турмуш қурган. Уларнинг икки нафар фарзанди бор. Карина Капур ўзининг Instagram саҳифасидаги сторисда “бу ҳодиса оиламиз учун жуда қийин кун” бўлганини айтди.
Актриса барча ОАВ ва папарацсилардан мавзуни ёритишда турли тахминлардан тийилишни ва оиласининг шахсий чегараларни ҳурмат қилишларини сўради.
“Биз ҳақимизда ташвишланганингиз ва қўллаб-қувватлаганингизни қадрлаймиз, аммо доимий назорат ва эътибор остида бўлиш бизнинг хавфсизлигимиз учун жиддий хавф туғдириши мумкин”, дея қўшимча қилди у.
Саиф Али Хон ҳақида
Актёр 1993 йилда Болливудда илк бор ҳинд киносига қадам қўйган. У фаолияти давомида 60 дан ортиқ фильмларда, жумладан, Уилям Шекспирнинг “Отелло” асарига мослаштирилган “Омкара” фильми, “Муқаддас ўйинлар” сериалида суратга тушган. У “Муҳаббат кеча ва бугун” мелодрамаси, “Агент Винод” триллери ва “Гоага бориб келамиз” комедиясига продюсерлик қилган. Раж Капурнинг невараси Карина Капур билан оила қурганига 10 йилдан ошди. Биринчи турмушидан актёрнинг икки фарзанди бор — қизи Сара Али Хон, у ҳам актриса ва ўғли Иброҳим Али Хон — Болливудда дебют қилиш арафасида. Иккинчи никоҳидан эса икки ўғли — Таймур ва Жеҳ исмли болалар вояга етмоқда.
Изоҳ (0)