Экология, атроф-муҳит ва иқлим ўзгариши вазирлиги томонидан Тошкент вилояти Юқори Чирчиқ тумани ҳудудидан оқиб ўтувчи Чирчиқ дарёсида назорат рейд тадбирлари олиб борилди. Бу ҳақда вазирлик матбуот хизмати хабар берди.
Қайд этилишича, рейд давомида дарёнинг муҳофаза минтақасидан 1 дона юкловчи ва 2 дона MAN русумли юк ташувчи транспорт воситалари ёрдамида шағал маҳсулотини ноқонуний қазиб олиб кетилаётгани аниқланган.
Суриштирув давомида қум-шағал “Шарқ нефтгаз бизнес” МЧЖ раҳбари О.К. томонидан қаздирилгани маълум бўлган. Ҳолат юзасидан тегишли далолатнома расмийлаштирилиб, ҳайдовчилар ва МЧЖ раҳбаридан тушунтириш хатлари олинган. Шунингдек, иккита юк машинаси ҳамда экскаватор жарима майдонига жойлаштирилган.
Шағал маҳсулоти қазилган жойда олиб борилган ўлчов натижасида табиатга етказилган зарар 6 миллиард 635 миллион 894 минг сўмни ташкил қилган. Ҳолат натижасида “Табиатни муҳофаза қилиш тўғрисида”ги қонуни 18-моддаси ҳамда “Ер ости бойликлари тўғрисида”ги қонуннинг 18-моддаси талаблари бузилган.
Ҳолатга ҳуқуқий баҳо бериш ва айбдорларга нисбатан қонуний чора кўришни таъминлаш мақсадида тегишли ҳужжатлар Бош прокуратурага юборилган.
Маълумот учун, президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинади. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилади.
Изоҳ (0)