Бугун, 20 декабрь куни бўлиб ўтган Олий Мажлис Сенатининг қирқ саккизинчи ялпи мажлисида сенатор Одилжон Иминов ерусти пиёда ўтиш кўприкларида ўрнатилган лифт ва эскалаторлар ишламаётгани ва баъзи жойларда умуман ўрнатилмаганини танқид қилди.
Бунинг натижасида ногиронлиги бўлган шахслар йўлнинг белгиланмаган жойларидан кесиб ўтмоқда. Давлатимиз раҳбари яқинда селектор йиғилишида 4 мингдан ортиқ ЙТҲ содир бўлганлигини таъкидлаб ўтдилар. Ҳодисаларнинг 47 фоизи пиёдаларни йўлнинг белгиланмаган жойларидан кесиб ўтиши натижасида содир бўлган. Албатта, бунинг ичида фақат ногиронлиги бўлган шахслар эмас, бошқа шахслар ҳам бор.
Шу масала юзасидан ҳам мутасаддилардан тушунтириш беришларини сўраган бўлар эдик, –деди сенатор.
Мазкур масаласа юзасидан Олий Мажлис Сенати раиси Танзила Норбоева фикр билдирар экан, бу ҳолат бўйича ижтимоий тармоқларда видеолар ҳам тарқалганини айтиб ўтди.
Кексалар, ёш болалар, болали аёллар, ногиронлиги бўлган шахслар ерусти пиёда ўтиш кўприкларидан фойдаланганда қийналаётгани ва табиийки, бундан улар норози бўлаётганлигини гувоҳи бўляпмиз. Масалан, Тошкент шаҳридаги Муқумий, Абдулла Қодирий, Шота Руставели кўчалардаги ерусти пиёда ўтиш кўприкларида лифт ва эскалаторлар ишламаяпти ёки умуман ўрнатилмаган.
Биз, биринчи навбатда, Тошкент шаҳри ҳокимлиги, Тоғ-кон, геология ва саноат хавфсизлигини назорат қилиш инспекцияси ҳамда Сенат, Мудофаа ва хавфсизлик масалалари қўмитаси биргаликда тегишли идора ва ташкилотлар билан юқорида айтилган масалаларни кўриб чиқишимиз лозим.
Инклюзивлик — тенглик ва адолатнинг муҳим асосидир. Бу жамиятнинг ҳар бир жабҳасида бўлиши керак, ҳар бир киши учун жамият ҳаётида иштирок этиш учун имконият яратиш зарур. Бу, айниқса, шаҳарсозлик ва транспортда муҳим аҳамиятга эга: биз ҳар бир инсон жисмоний чекланишларига қарамай эркин ҳаракатланишини таъминлашга интилишимиз керак, – деди Танзила Норбоева
Сенат раиси муаммо юзасидан ўн кун муддатда ечими кўрсатилган таклифлар киритиш бўйича топшириқ берди.
Изоҳ (0)