Тошкент шаҳри Мирзо Улуғбек туманида 32 ёшли аёл лифтда қамалиб, вафот этгани хабар қилинганди. Камбағалликни қисқартириш ва бандлик вазирлиги аёлга товон пули тўланиши юзасидан маълумот берди.
Вазирлар Маҳкамасининг 1997 йил 6 июндаги қарори билан тасдиқланган низомга асосан ишлаб чиқаришдаги ва ходимлар билан иш вақтида содир бўлган бахтсиз ҳодиса юзасидан иш берувчи дарҳол ҳудудий меҳнат органига хабар бериши кераклиги кўрсатиб ўтилган. Ушбу низом талабларига асосан ходимнинг жароҳатига қараб, қолаверса, оғирлик даражасидан қатъи назар, гуруҳий бахтсиз ҳодисалар Меҳнат инспекцияси томонидан махсус текширилиши кўрсатиб ўтилган.
Бунда текшириш жараёнига корхона томонидан берилган вакиллар қатнашиши белгилаб ўтилган. Жумладан, Ўзбекистон почтаси Тошкент филиали, Яшнобод тумани, Паркент кўчаси 74-уйда жойлашган 7-алоқа бўлимида хат-хабар тарқатувчи аёл билан содир бўлган бахтсиз ҳодиса юзасидан корхона томонидан инспекцияга хабар берилган. Ҳодисани текшириш учун комиссия аъзолари вакиллари ҳам тақдим этилган.
Тошкент шаҳар камбағалликни қисқартириш ва бандлик бош бошқармаси Меҳнат назорати инспекцияси томонидан ушбу ҳодисани махсус текшириш ишлари бошланган.
Лифтда қамалиб вафот этган аёл воқеаси
Аёл 24 июль куни соат 14:50 ларда кўп қаватли уйнинг лифтига кириб, қайтиб чиқмаган. 26 июль куни марҳуманинг яқин қариндошлари томонидан ички ишлар идорасига бедарак йўқолганлиги юзасидан хабар берилган, 27 июль куни эса унинг жасади лифт ичидан топилган. Марҳума 4 кун давомида лифт ичида қолиб кетган.
Ижтимоий тармоқларда тарқалган хабарларда одам ўлими билан якунланган ушбу кўнгилсизликка электр энергияси таъминотидаги доимий узилишлар сабаб қилиб кўрсатилганди. Текшириш давомида ушбу лифт бир неча кундан буён ишламаётгани, олдин ҳам ишламай қолиши ҳолатлари кўп маротаба бўлгани ҳақида уй яшовчилари томонидан тушунтиришлар берилган. Шунингдек, воқеа жойида холис суриштирув олиб борган ОАВ вакиллари, жумладан, “Дарё” мухбирининг видеорепортажларида ҳам ўз тасдиғини топган.
Саноат хавфсизлиги давлат қўмитаси “28 июль куни мутахассислар томонидан жойига чиқиб ўрганилганида, лифт қурилмасининг хавфсизлик мосламалари ишчи ҳолатдалиги юзасидан бирламчи кўрик ишлари амалга оширилди ва уларни ишчи ҳолатдалиги аниқланди” деб расмий муносабат билдирган.
Ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилди.
Бош прокуратуранинг билдиришича, тергов ўтказиш йўли билан қонуний қарор қабул қилиниши таъминланади.
Изоҳ (0)