Тошкент шаҳри Мирзо Улуғбек туманида 32 ёшли аёл лифтда қамалиб, вафот этгани хабар қилинганди. Депутат Алишер Қодиров мазкур воқеа ҳақида гапириб, Қурилиш вазирлигини танқид қилди.
“Миллий тикланиш” ва ЎзЛИДЕП фракцияларининг қўшма йиғилишида депутатлар “Инсонга эътибор ва сифатли таълим йили”да амалга оширишга оид давлат дастурининг 2023 йил I ярим йилдаги ижроси юзасидан адлия вазирининг ҳисоботини эшитди. Йиғилишда Алишер Қодиров яқинда Тошкентда лифтда қамалиб қолиб, ҳаётдан кўз юмган аёл воқеасини эслаб, XXI асрда лифт ичида одам қолиб кетиб, вафот этиши мумкин эмаслигини таъкидлади.
“Дунё тажрибасида бунинг оддий ечими лифтга битта SIM-карта ўрнатиш экан. Яъни бу мослама ёрдам зарур бўлганда фавқулодда вазиятлар ёки бошқарув пунктига хабар жўнатади. Қурилиш вазирлиги наҳот шу нарсани эътиборга олмаётган бўлса? Ахир XXI асрда бундай воқеалар бўлиши мумкин эмас-ку”! – деди фракция раҳбари Қурилиш вазирлиги масъулларига қарата.
Қайд этилишича, вазирлик вакили “ҳозир бу масалани ўрганяпмиз, кўриб чиқяпмиз” деган жавобдан нарига ўтмади. Депутатлар ушбу масалада мутасадди ташкилотларга эътироз билдириб, бундай ҳолат такрорланмаслиги учун назоратни, талабни кучайтириш, қанча маблағ зарур бўлса ажратиш кераклигини таъкидлади.
Лифтда қамалиб вафот этган аёл воқеаси
Аёл 24 июль куни соат тахминан 14:50 ларда кўп қаватли уйнинг лифтига кириб, қайтиб чиқмаган. 26 июль куни марҳуманинг яқин қариндошлари томонидан ички ишлар идорасига бедарак йўқолганлиги юзасидан хабар берилган, 27 июль куни эса унинг жасади лифт ичидан топилган. Марҳума 4 кун давомида лифт ичида қолиб кетган.
Ижтимоий тармоқларда тарқалган хабарларда одам ўлими билан якунланган ушбу кўнгилсизликка электр энергияси таъминотидаги доимий узилишлар сабаб қилиб кўрсатилганди. Текшириш давомида ушбу лифт бир неча кундан буён ишламаётгани, олдин ҳам ишламай қолиши ҳолатлари кўп маротаба бўлгани ҳақида уй яшовчилари томонидан тушунтиришлар берилган. Шунингдек, воқеа жойида холис суриштирув олиб борган ОАВ вакиллари, жумладан, “Дарё” мухбирининг видеорепортажларида ҳам ўз тасдиғини топган.
Саноат хавфсизлиги давлат қўмитаси “28 июль куни мутахассислар томонидан жойига чиқиб ўрганилганида, лифт қурилмасининг хавфсизлик мосламалари ишчи ҳолатдалиги юзасидан бирламчи кўрик ишлари амалга оширилди ва уларни ишчи ҳолатдалиги аниқланди” деб расмий муносабат билдирган.
Ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилди.
Бош прокуратуранинг билдиришича, тергов ўтказиш йўли билан қонуний қарор қабул қилиниши таъминланади.
Изоҳ (0)