Кино саноатида ҳар бир рол катта машҳурлик учун ажойиб имконият калити бўлиши мумкин. Буни билган актёр ва актрисалар маълум образни қўлга киритиш учун баъзида ёлғон ишлатишга қарор қилади. Қуйидаги шоу-бизнес вакиллари ҳам ўз орзусини амалга ошириш учун ҳийла-найрангдан фойдаланишдан ҳеч қачон қўрқмаган.
Роберт Паттинсон
“Сумерки” франшизасидаги машҳур вампир, “Теннет” илмий-фантастик блокбастери юлдузи ҳамда “Бетмен” супер қаҳрамони билан танилган Роберт Паттинсон бир вақтлар кино саноатига кириб келишга уринаётган ёш актёр эди. Муваффақиятга эришиш йўлида у айёрликдан фойдаланган ва бу ҳақда узоқ йиллар ўтиб иқрор бўлган:
“Мен кўп йиллар давомида ишсиз қолган эдим. Биринчи марта Лос Анжелесга келганимда, кастинг директорлари мендан сўнгги йилларда нималар билан банд бўлганимни сўрашган. Мен эса RADA’да ўқиганим ҳақида айтганман. Бу сўзлар менинг инглизча аксентим туфайли янада ишонарли чиққан эди”, деди Паттинсон Mirror нашрига.
RADA (Royal Academy of Dramatic Art) — Британияда жойлашган энг машҳур ва нуфузли актёрлик ва драма санъати академиясидир. У дунёдаги энг яхши актёрлик мактабларидан бири сифатида танилган.
Паттинсоннинг бахтига ҳеч ким унинг дипломини ва бошқа ҳужжатларини текширмаган ва ролга қабул қилган.
Мила Кунис
Актриса Мила Кунис интервьюларининг бирида “70 йиллар шоуси” телесериалида Жеки Бюрхарт ролини ижро этиш учун ўзининг ҳақиқий ёшини яширишга мажбур бўлганини маълум қилган. Лойиҳада иштирок этиш учун ариза берувчи актрисалар 18 ёшдан ошган бўлиши керак эди, лекин Мила эндигина 14 ёшга тўлганди.
Бўлажак юлдуз ўзига бир эмас, икки эмас, нақд тўрт ёш қўшиб олган эди. Продюсерлар унинг ҳақиқий ёшини истеъдодли эканлигидан кейингина билган. Шундай қилиб, “70 йиллар шоуси”даги рол Миланинг карьерасидаги бошланғич нуқтага айланган.
Эдди Редмейн
Эдди Редмейн истеъдодли актёр бўлса-да, отга миниш маҳоратидан бехабардир. “Елизавета I” телесериалидаги ролга кастинг вақтида режиссёр Том Ҳупер актёрдан “Отнинг эгаридан тушиб кетмаслигингизга ишончингиз комилми?” деб сўраган. Редмейн имкониятни бой беришни истамай, от минишни билишига барчани ишонтирган. Аммо суратга олиш майдончасида унинг сўзлари ёлғон эканлиги аён бўлган:
“Суратга олиш жамоаси “Мотор” деб бақирганида мен том маънода соатига 100 мил тезликда от билан пастга туша бошладим. Мен ҳам ўзимни, ҳам жамоанинг ярмини катта хавф остига қўйдим”, деди Редмейн Конан ЎБраенга берган интервьюсида.
Режиссёр шу вақтда актёрга қарата: “Сен ғирт ёлғонч экансан, Редмейн!” дея хитоб қилган. Шундан сўнг Эдди дарҳол от миниш курсларига юборилган.
Хлоя Грэйс Moreтс
Хлоя Грэйс Moreтс ўсмирлик вақтида “Гюго” фильмидаги Изабел ролини олишни жуда истаган ва режиссёр Мартин Скорсезега ёлғон гапиришга қарор қилган. Фильм қаҳрамон британиялик бўлганлиги сабабли, актриса тингловга британча аксент ва тўқима ҳикоялари билан келган.
“Кастинг директори менинг британиялик эмаслигимни билар эди, лекин менинг ёлғон гапиришга тайёрлигимни кўриб мени олиб қолган”, деди актриса.
Крис Ҳемсворт
Бўйи 190 сантиметр бўлган актёр Крис Ҳемсворт кастинг пайтида баъзида атайин бўйини пастроқ айтишга одатланган эди
“Мен ижро этишни истаган ролларга бўйим ва гавдам унчалик мос тушмас эди, шу сабабли параметрларимни кичикроқ қилиб айтар эдим”, деди актёр Radio Times нашрига берган интервьюсида.
Бироқ унинг баланд бўйи бошқа фильмлар учун устунлик берар эди:
“Тор образи учун қўйиладиган талаблардан бири актёр бўйининг 180 дан баланд бўлиши эди. Шу сабабли Момақалдироқ худоси ролига мен идеал номзод сифатида кўрсатилганман”, дейди Ҳемсворт.
Энн Ҳетеуэй
Энн Ҳетеуэй “Эгри тоғ” фильмида бош ролни олиш учун кастинг директорларини от мина олишига ишонтирган.
“Ота-онам бир вақтлар менга қимматли маслаҳат беришган: агар сендан бирор нарса қила оласизми, деб сўрашса, доим “ҳа” деб жавоб бер. Агар етарлича ҳаракат қилсанг, икки ҳафта ичида барча нарсани ўрганиб олиш мумкин”.
Актриса режиссёрни моҳир чавандоз эканлигига ишонтирган ва кастингдан ўтгач, дарҳол от миниш курсларига ёзилган. Бироқ суратга олиш пайтида кутилмаганда от Эннга қулоқ солмаган ва барча профессионал родеочилар кўз ўнгида ерга улоқтириб юборган.
Изоҳ (0)