2024 йил профессионал бокс учун чинакам бурилиш йили бўлди. Бу кўп жиҳатдан саудиялик шайхлар ва яккакурашлар, умуман спортнинг асосий қадрдонига айланиб улгурган Турки ал аш-Шайх билан боғлиқ. У бир вақтнинг ўзида Олександр Усик ва Тайсон Фьюри ўртасида иккита жанг ташкиллаштиришга, Дмитрий Бивол ва Артур Бетербиев ўртасида жанг ўтказишга муваффақ бўлди. Ва, афтидан, 2025 йил эндигина бошланганига қарамасдан, Туркида аллақачон катта режалар бор.
“Ўйлайманки, шундай бўлади, — дея жавоб берди у бокс тарихида ёрқин йил бўлиши ҳақидаги саволга. — Биз жуда кучли бошладик ва аллақачон кўплаб шартномалар тузганмиз, лекин ҳаммасини эълон қилиш учун идеал вақтни кутамиз”.
Айтиш керак бўлган биринчи нарса, албатта, Бивол билан Бетербиев ўртасидаги реванш жанги. Икки россиялик чемпион февраль ойида яна рингга кўтарилади ва ушбу супержангдан ташқари, турнир кардида яна олтита чемпионлик жанги бўлади. Даниэль Дюбуа, Шакур Стивенсон, Чжан Чжилей, Ҳамза Шираз ва бошқа етакчи боксчилар Саудия Арабистонидаги бокс оқшомини безашади — бундай кардни тасаввур қилишни ўзи ажойиб.
Апрель ойида Саудия шайхлари кичик Крис Юбенк ва Конор Бенн бошчилигидаги турнирни режалаштирган. Икки етакчи британиялик боксчи 2022 йилда тўқнашиши керак эди, аммо Бенн тақиқланган моддаларни истеъмол қилгани учун дисквалификация қилинган. Бу қарама-қаршиликка боксчиларнинг оталари — Крис Юбенк ва Найжел Бенннинг ўтмиши ҳам қиймат қўшади. 90 йилларда улар Британия бокси тарихидаги энг машҳур қарама-қаршиликлардан бирини бошлаб берган: биринчи жангда Юбенк Бенни нокаутга учратиб, чемпионлик камарини қўлга киритган ва реваншда дуранг қайд этилган. Энди уларнинг қарама-қаршилигидаги янги тарих — ўғилларнинг тўқнашуви, албатта, Британия жамоатчилигида катта қизиқиш уйғотади.
Май ойи охирида, Турки ал аш-Шайхнинг сўзларига кўра, 5х5 форматида яна бир турнир ўтказилиши режалаштирилган. Бундай турнирнинг дастлабкиси 2024 йилда бўлиб ўтган, бокс кечасида промоутерларнинг беш нафар вакили Эдди Ҳирн ва Фрэнк Уоррен бир-бирига қарши кураш олиб боришган. Энди Турки уни яна такрорламоқчи. Бундан ташқари, ал аш-Шайх август ойидаги режаларини промоутерлар билан муҳокама қилмоқчи. Октябрь ва декабрь ойларида эса бизни иккита йирик бокс оқшоми кутмоқда, улар устида иш олиб борилмоқда. Шайх номларни ошкор этмаяпти, лекин жарангдор турнир бўлиши аниқ.
Турки Девин Хейни — Райан Гарсия ўртасидаги шов-шувли жанг бўйича музокараларни муваффақиятли якунлаганини айтди. Гарсиянинг дисквалификация муддати тугайди, шунинг учун 2025 йил охирида юлдуз боксчилар яна рингга чиқишлари мумкин бўлади.
Албатта, Теренс Кроуфорд — Сауль Алварес ўртасидаги потенциал жанг Туркида янада катта қизиқиш уйғотмоқда. Сўнгги пайтларда жангни ҳақиқатан ҳам ташкил этишга ҳаракат қилишаётгани ва боксчилар билан музокаралар олиб борилаётгани ҳақида гап-сўзлар кўпаймоқда. Канело буни билвосита тасдиқлади, аш-Шайх ҳам жангга қизиқиш билдираётганини таъкидлаган. Агар у манфаатдор бўлса, демак, тўқнашув эртами-кечми бўлиб ўтади, буёғи фақат вақт масаласи. 2025 йил эса икки дунё юлдузининг жангини кўриш учун идеал вақт бўлиши мумкин.
Шунингдек, аш-Шайх яқинда ўзи томонга оғдирган асосий юлдузлардан бири — Наоя Иноуэни эътиборидан четда қолдирмаслигини таъкидлади. Икки вазн тоифасида мутлақ жаҳон чемпиони 24 январь куни Ким Э Жунга қарши жанг қилди ва 4-раундда нокаут эвазига ғалаба қозонди. Энди Турки япониялик боксчини британиялик енгилмас чемпион Ник Болл билан тўқнаштиришни режалаштирмоқда. Бунинг учун Иноуэ яна бир вазнини кўтарилиши керак бўлади, аммо бу Монстр лақабли спортчи учун муаммо туғдирмайдиган кўринади.
“Қироллик” дивизионисиз йилни ёрқин дейиш мушкул, албатта. Айнан супер оғир вазнлилар 2024 йилда алоҳида эътиборни тортди ва ал аш-Шайх бундан кейин ҳам оғир вазнда шов-шувли жангларни ташкил этишни режалаштирмоқда. Олександр Усик — Тайсон Фьюри жангидан сўнг украиналик боксчи дарҳол Даниэль Дюбуа билан рингда ўзига хос стердаун ўтказди ва афтидан, барча томонлар ушбу жангдан манфаатдор, бу эса уни ўтказиш имкониятини оширади. Аммо Туркининг ўзи Усик учун бошқа вариантни кўради.
“Агар вақтимиз бўлса, келажакда Мозес Итаумунинг Олександр Усикка қарши жангини кўришни хоҳлайман. Албатта, вақтимиз бўлса ва Усик фаолиятини якунламас”, — дейди ал аш-Шайх.
Шунингдек, Шайх Тайсон Фьюрини ҳам унутмади. Британиялик боксчи Туркининг севимли спортчиларидан бири ва гарчи “Лўлилар Қироли” фаолиятини якунлаганини эълон қилган бўлса-да, ал аш-Шайх унинг рингга қайтиши учун навбатдаги катта пул мукофоти шаклида жиддий сабаблар топа олиши мумкин. Унда эса Энтони Жошуа билан шов-шувли жанг ўтказиш имконияти мавжуд.
Турки ал аш-Шайх ўтган йилда профессионал бокс оқшомлари қандай бўлиши кераклигини ўргатди. Саудия шайхларининг куч-ғайрати ва пули тугаб қолмаслигига шу билан бирга 2025 йилда ҳам барча бокс мухлисларига янада ёрқин ва қизиқарли беллашувларни инъом этишига умид қиламиз.
Изоҳ (0)