Toshkentda madaniy meros obyekti yonida noqonuniy qurilish to‘xtatildi, deb xabar bermoqda Madaniyat va san’atni rivojlantirish jamg‘armasi.
Keltirilishicha, Toshkent tumanlararo iqtisodiy sudi Yakkasaroy tumani Yusuf Xos Hojib ko‘chasi, 28-uy manzilida olib borilayotgan qurilish ishlarini to‘xtatdi. Da’vo arizasi O‘zbekiston Madaniyat va san’atni rivojlantirish jamg‘armasi tashabbusi bilan Madaniy meros agentligi tomonidan O‘zbekiston amaliy san’at muzeyiga tahdid solayotgan qonunbuzarliklar sababli kiritildi.
Qayd etilishicha, muzey muhim madaniy meros obyekti va Toshkent modernizmining diqqatga molik namunasi hisoblanadi. Shu singari maskanlarni muhofaza qilish nafaqat tarixni, balki shaharning me’moriy qiyofasini saqlab qolish uchun ham muhim ekani ta’kidlandi.
Bundan avval ijtimoiy tarmoqlarda Andijon shahrida joylashgan Zahiriddin Muhammad Bobur haykalini ko‘chirib, o‘rniga turar joy qurish rejalashtirilgani haqidagi xabar keng muhokamalarga sabab bo‘lgandi. Andijon viloyat hokimligi ushbu xabar yuzasidan munosabat bildirib, maydonning Bobur shohko‘chasini bog‘lovchi ko‘prik ostida qolib ketishi bilan bog‘ladi.
Madaniy meros agentligi mazkur holat yuzasidan munosabat bildirdi. Ta’kidlanishicha, holat yuzasidan Andijon viloyati Madaniy meros boshqarmasi mutaxassislari tomonidan o‘rganish ishlari olib borilgan. Zahiriddin Muhammad Bobur monumental san’at yodgorligi O‘zbekiston Respublikasi Vazirlar Mahkamasining 2019-yil 4-oktyabrdagi 846-sonli qarori bilan Moddiy madaniy merosning ko‘chmas mulk obyektlari milliy ro‘yxatiga kiritilgan.
Izoh (0)