Бахтиёр Ибрагимов Ўзбекистоннинг Словакиядаги биринчи элчиси (қароргоҳи Вена шаҳрида жойлашган) бўлди. Бу ҳақда 7 март куни “Дунё” ахборот агентлиги хабар берди.
Қайд этилишича, Братиславадаги “Грассалковичлар” саройида бўлиб ўтган тантанали маросимда у мамлакат президенти Петер Пеллегринига ишонч ёрлиғини топширди.
Маросимдан сўнг ўтказилган мулоқот чоғида Ўзбекистон ва Словакия ўртасидаги ҳамкорликнинг ҳозирги ҳолати ва уни ривожлантириш истиқболлари муҳокама қилинди. Томонлар сўнгги йилларда икки томонлама муносабатлар сифат жиҳатидан янги босқичига кўтарилаётганини таъкидлади. Шунингдек, 2025 йилда сиёсий, савдо-иқтисодий ва маданий-гуманитар соҳаларда салмоқли қўшма тадбирлар белгилангани қайд этилди.
Бахтиёр Ибрагимов 2025 йилнинг январида Альбания президенти Байрам Бегайга Ўзбекистоннинг ушбу мамлакатдаги элчиси (қароргоҳи Вена шаҳрида жойлашган) сифатидаги ишонч ёрлиғини топширганди. У 2023 йил ноябридан Ўзбекистонинг Австриядаги элчиси лавозимида ҳам ишлаб келмоқда.
Шунингдек, у 2023 йилда штаб квартираси Вена шаҳрида жойлашган ЙХҲТ, БМТ Гиёҳванд моддалар ва жиноятчиликка қарши курашиш бошқармаси, Ядро синовларини кенг қамровли тақиқлаш тўғрисидаги шартнома ташкилоти, ХАЭА каби халқаро ташкилотлардаги Ўзбекистоннинг расмий вакили сифатида ҳам аккредитация қилинган.
6 март куни Шавкат Мирзиёев 6 та давлат — Миср, Италия, Қирғизистон, Беларусь, Грузия ва Туркиядан янги тайинланган элчилардан ишонч ёрлиқларини қабул қилиб олганди.
Изоҳ (0)