Ўзбекистон Маданият ва санъатни ривожлантириш жамғармаси ташаббуси билан 21 та бино модернизм даври объекти мақомини олди ва миллий маданий мерос объектлари рўйхатига киритилди. Бу ҳақда жамғарма матбуот хизмати хабар берди.
Қайд этилишича, Вазирлар Маҳкамасининг 2024 йил 22 апрелдаги “Моддий маданий мерос объектларининг миллий рўйхатига ўзгартириш ва қўшимчалар киритиш тўғрисида”ги 227-сон қарори қабул қилинган.
Биринчи босқичда Давлат санъат музейи, “Ўзбекистон” ва “Шодлик” меҳмонхоналари, “Космонавтлар” метро бекати, Авиация ишлаб чиқарувчилар саройи каби 11 та янги объект рўйхатга киритилди, 10 та объектнинг мақоми ўзгартирилган.
Жамғарма юқорида қайд этилган модернистик услубдаги биноларни UNESCO’нинг Бутунжаҳон мероси рўйхатига киритиш учун номзоднома тайёрламоқда.
Март ойи охирларида Вазирлар Маҳкамаси қарори билан Тошкент шаҳри ва вилоятлардаги 160 га яқин мозаик панно монументал санъат ёдгорликлари сифатида Моддий маданий мероснинг кўчмас мулк объектлари миллий рўйхатига киритилган эди. Шу қарор билан мозаикали биноларга реклама баннерларини ўрнатиш тақиқланган.
Изоҳ (0)