Ўзбекистонда жами талабаларнинг 782 мингини хотин-қизлар ташкил қилиши маълум бўлди. Бу ҳақда Олий таълим, фан ва инновациялар вазирлиги хабар берди.
Маълум қилинишича, бугунги кунда олийгоҳларда жами талабалар сони 1 млн 489 минг нафардан ошган бўлиб, шундан хотин-қизлар 782 мингни ( яъни 52,5 фоиз) ташкил этади. Магистратура босқичида таҳсил олаётган жами талабалар 37 минг 839 нафар бўлиб, уларнинг 23 минг 628 нафари (62,44 фоиз) талаба-қизлардир.
Давлат олийгоҳларининг магистратура босқичида тўлов-контракт асосида ўқишга қабул қилинган хотин-қизларнинг контракт тўлови 2022 йилдан буён тўлиқ давлат бюджети ҳисобидан қоплаб берилмоқда. Охирги уч йилда бу мақсад учун 285,8 млрд сўм маблағ йўналтирилди.
Шунингдек, 2023/2024-ўқув йилидан бошлаб, қурилиш, транспорт, коммунал хўжалик, қишлоқ хўжалиги ва хизмат кўрсатиш йўналишлари бўйича техникумларга тўлов-контракт асосида қабул қилинган 2 385 нафар хотин-қиз давлат гранти асосида таҳсил олиш имкониятига эга бўлди. Мазкур ўқув йилида 5 991 нафар талаба-қиз учун 60,3 млрд сўм маблағ давлат бюджети ҳисобидан ажратилди.
Олий таълимдан кейинги босқичда ҳам хотин-қизларнинг фаоллиги ортиб бормоқда. Ҳозирда стажёр-тадқиқотчилар ва докторантурада таҳсил олаётган тадқиқотчилар 11 092 нафарни ташкил этса, уларнинг 5 831 нафари (52 фоиз) хотин-қизлардир.
Шунингдек, ҳар йили эҳтиёжманд оилалар фарзандлари бўлган 2 000 нафар хотин-қиз давлат гранти асосида олийгоҳларга ўқишга қабул қилинади. Бу орқали бугунга қадар 7 000 га яқин хотин-қизлар таълим гранти имкониятидан фойдаланди.
Иқтидорли хотин-қизларнинг хорижда малака оширишларини қўллаб-қувватлаш мақсадида 2024 йилда 105 нафар ёш олиманинг илмий стажировкаси молиялаштирилди. Улар Буюк Британия, Туркия, Россия, Венгрия, Беларусь, Италия, Испания, АҚШ, Хитой ва бошқа мамлакатларда тажриба орттириб қайтди.
Бугунги кунда олима аёллар раҳбарлигида умумий қиймати 82,6 млрд сўмлик 101 та илмий лойиҳа амалга оширилмоқда. Бундан ташқари, хотин-қизларнинг 25,5 млрд сўмлик 68 та стартап лойиҳалари молиялаштирилди.
Олий таълим, фан ва инновациялар вазирлигида Хотин-қизлар ва эркаклар учун тенг ҳуқуқ ҳамда имкониятларни таъминлаш масалалари бўйича маслаҳат кенгаши ташкил этилган. 2024 йил давомида 25 000 дан ортиқ маънавий-маърифий тадбирлар, 15 000 дан зиёд миллийликни тарғиб этишга қаратилган дастурлар ҳамда 8 000 дан ортиқ хотин-қизлар ҳуқуқларини янада такомиллаштиришга оид танловлар ўтказилди.
Шунингдек, 2025 йилда 25 000 нафар маҳаллалардаги ишсиз ёшлар ва хотин-қизлар қисқа муддатли курсларда касбий билим олиши режалаштирилган. Бундан ташқари, қизлар ўртасида “Тўмарис издошлари” ҳарбий-спорт мусобақалари ташкил этилади.
Ўзбекистонда эндиликда камбағал оиланинг фарзандига таълим кредити фоизсиз берилади, қўшимча грант ажратилади, контракт тўловининг бир қисми қоплаб берилади.
Изоҳ (0)