“Нукус давлат техника университетини ташкил этиш тўғрисида”ги президент қарори қабул қилинди.
Қарорга кўра, Навоий давлат кончилик ва технологиялар университети ҳузуридаги Нукус кончилик институти ҳамда Тошкент ахборот технологиялари университети Нукус филиали негизида Нукус давлат техника университети ташкил этилади.
Ҳужжатда қайд этилишича, Қорақалпоғистон Республикасида муҳандислик соҳаларида юқори малакали кадрлар тайёр;аш, таълим, илм-фан ва ишлаб чиқариш ўртасида ўзаро интеграцияни йўлга қўйиш, ўқитиш усули ва шаклларини такомиллаштириш, таълим жараёнига инновацион технологияларни жорий этиш орқали таълим сифатини ошириш мақсад қилинган.
Саноат, техника-технология, муҳандислик соҳалари учун олий маълумотли мутахассислар ва илмий-педагогик кадрлар тайёрлаш, қайта тайёрлаш ҳамда уларнинг малакасини ошириш университетнинг асосий вазифаларидан бири этиб белгиланди.
Университетда Илғор муҳандислик мактаби фаолияти ташкил этилади.
2025/2026-ўқув йилигача университетда тажриба-ишлаб чиқариш (спин-офф) корхонаси ташкил этилади.
Университетга халқаро эътироф этилган ташкилотлат рейтингида биринчи 300 талик рўйхатга кирган хорижий олий таълим ташкилотларининг дастурлари асосида ўз таълим дастурларини шакллантириш ҳуқуқи берилади.
2025/2026-ўқув йилидан университет талабаларининг фанларни ўзлаштириш кўрсаткичини ва профессор-ўқитувчиларнинг фаолият самарадорлигини халқаро тажрибалар асосида баҳолаш тизими жорий этилади.
Амударё муҳандислик-технологиялар техникумида муҳандислик соҳаларидаги касблар бўйича касбий таълим дастурларида тўлиқ давлат гранти асосида ўрта бўғин кадрлари тайёрлаш йўлга қўйилади.
Ҳозирда таҳсил олаётган барча талабалар ўқишини университетда давом эттиради ва битирувчи курс талабаларига белгиланган тартибда университет дипломи берилади.
Бундан аввал Қашқадарё, Бухоро ва Наманганда ҳам техника университети ташкил этилиши хабар берилганди.
Ўзбекистонда ташкил этилаётган техника университетлари ҳақида
Нукус, Бухоро, Наманган, техника университетлари ташкил этилиши ҳақида 22 январь куни олий таълим ва илм-фан соҳасидаги устувор вазифаларга оид тақдимотда маълум қилинганди. Умуман, бу йўналишдаги 35 та муассасани йириклаштириш ҳисобига, 22 та техника университети ташкил қилинади. Шу йил охиригача яна 17 та муҳандислик мактаби очилади.
2024 йил 20 июнда бўлиб ўтган видеоселектор йиғилишида давлат раҳбари ҳар бир ҳудудда техника олийгоҳи ва илғор муҳандислик мактаблари ташкил қилиш вазифасини қўйган эди. Ҳозиргача Термиз, Андижон ва Қаршида техника университетлари ташкил бўлди. Шунингдек, 8 та муҳандислик мактаби очилди.
Изоҳ (0)