Ҳиндистон ҳарбий-ҳаво кучлари янги самолётларга эҳтиёж сезмоқда. Ҳиндлар бешинчи авлодга мансуб Россиянинг Су-57 ва АҚШнинг F-35 самолётларини харид қилишни режалаштирмоқда. Бу ҳақда Meduza нашри хабар берди.
Манбага кўра, ҳиндлар катта миқдорда ҳарбий учоқлар сотиб олмоқчи эмас. Мамлакат 2035 йилдан бошлаб ўзининг АМCА номли самолётини ишлаб чиқаришни бошлайди. Бироқ шунга қадар ҳаво кучларига зарурий учоқлар сотиб олинади.
Қайд этилишича, Ҳиндистон ҳукумати Россия ва АҚШ билан ҳарбий учоқлар борасида ҳали ҳеч қандай расмий музокаралар бошламаган.
Ҳиндистон ҳарбий-ҳаво кучлари (NNK) таркибида иккита эскадрон Россия ишлаб чиқарган МиГ-21 самолётлари (тахминан 30 та) мавжуд. Бироқ улар 2025 йил сентябрида фойдаланишдан чиқарилади. Шундан сўнг, Ҳиндистонда 29 та эскадрон қолади — бу мамлакат ҳарбий-ҳаво кучлари тарихидаги энг кам кўрсаткич бўлади.
Самолётлар етишмовчилиги муаммосини ҳал қилиш учун ҳинд ҳарбийлари қўшимча француз Rafale қирувчи самолётларини харид қилиш имкониятини ҳам кўриб чиқмоқда.
Умуман олганда, Ҳиндистон 114 та Rafale қирувчи самолётларини қўлга киритишни режалаштирмоқда, уларнинг катта қисми мамлакат ҳудудида йиғилиши керак. Айнан шу самолётлар яқинда Ҳиндистон ва Покистон ўртасидаги можарода фаол ишлатилган. Покистон Ҳиндистон HHKнинг олти ҳарбий самолётни, жумладан Rafale’ни уриб туширганини даъво қилган. Ҳинд томони эса бу хабарларни ёлғон деб атаган.
Bloomberg агентлигининг июль ойида берган хабарига кўра, АҚШ президенти Дональд Трамп 2025 йилнинг февралида Вашингтонга ташриф буюрган Ҳиндистон бош вазири Нарендра Модига F-35 самолётларини сотиш бўйича келишув таклиф қилган. Бироқ Ҳиндистон томони бу таклифни рад этган. Улар мудофаа қуролларини мамлакат ичида ишлаб чиқаришга қизиқаётганларини билдирган.
Изоҳ (0)