АҚШнинг собиқ президенти Дональд Трамп Вашингтонда бўлиб ўтган Либертарлар миллий қурултойида агар у қайта сайланса, Россия ва Украина ўртасидаги можарога чек қўйишга ваъда берди.
Президентлик сайловида ғалаба қозонганимдан кейин Овал кабинетга қайтишимдан олдин, Россия ва Украина ўртасидаги даҳшатли урушга барҳам бераман, шунда биз бошқа одамларнинг можароларига юзлаб миллион долларларни беҳуда сарфлашни тўхтатамиз ва минглаб одамларнинг ҳаётини сақлаб қоламиз, — деди Трамп
Сиёсатчи айнан қандай натижага эришмоқчи эканлиги тафсилотларини ошкор қилмаган. Бундан ташқари, у тинчлик ва барқарорликни тиклашга, АҚШнинг амалдаги президенти Жо Байденнинг учинчи жаҳон уруши сари юришини тўхтатишга ваъда берган.
Сиз учинчи жаҳон уруши томон кетаётганимизни биласиз, тўғрими? — сўради Трамп.
Трамп аввалроқ агар у қайта сайланса, Россия ва Украина ўртасидаги можарони атиги 24 соат ичида ҳал этиш ниятида эканини бир неча бор таъкидлаган эди. Президент матбуот котиби Дмитрий Песков ушбу баёнотларни шарҳлар экан, бундай оддий ечим учун бу жуда мураккаб муаммо эканлигини таъкидлаган.
Маълумот учун, АҚШда президентлик сайловлари 2024 йил 5 ноябрда бўлиб ўтади. Сайлов пойгасининг асосий иштирокчилари — амалдаги давлат раҳбари, демократ Жо Байден ҳамда собиқ Америка етакчиси, республикачи Дональд Трамп.
Изоҳ (0)