Япония ҳукумати 11 август куни мамлакат жануби-ғарбида кучли ёмғирлар оқибатида юзага келган сув тошқинлари ва кўчкилар сабабли уч миллион аҳолига уйларини тарк этиш чақириғи билан мурожаат қилди. Табиий офатлар натижасида бир неча киши бедарак йўқолган.
Маҳаллий телеканаллар Кумамото префектурасида сувнинг баландлиги тахминан бир метрга етиб, турар жой бинолари, дўконлар ва автомобилларни сув босганини кўрсатувчи тасвирларни намойиш этган.
Япония метеорология агентлиги маълумотига кўра, душанба куни эрталабки олти соат ичида энг кўп зарар кўрган Тамана шаҳрида 37 сантиметрдан ортиқ ёғин ёққан. Бу ушбу ҳудуд учун янги рекорд ҳисобланади. Метеорологлар вазиятнинг ҳаёт учун ўта хавфли эканлигини таъкидлаб, зудлик билан хавфсизлик чораларини кўришни талаб қилди ва аҳолини ниҳоятда ҳушёр бўлишга чақирди.
Асосан ушбу префектурада яшовчи 384 мингга яқин аҳоли учун Япониянинг Ёнғин ва табиий офатларга қарши кураш агентлиги томонидан энг юқори даражадаги огоҳлантириш эълон қилинган Кумамото шаҳрига алоҳида эътибор қаратилган.
Коса шаҳрида бир эркак уйига кўчки тушганидан сўнг бедарак йўқолган. Мисато шаҳрида қутқарувчилар кўчки натижасида зарар кўрган уйда қамалиб қолган кекса эркакка ёрдам беришга уринмоқда. Бундан ташқари, йирик Фукуока шаҳрининг икки фуқароси якшанба куни дарёда оқиб кетган ва ҳозиргача бедарак йўқолган деб ҳисобланмоқда.
Изоҳ (0)