Уфук Улуташ Туркиянинг Ўзбекистондаги янги элчиси бўлди. Бу ҳақда ТИВ матбуот хизмати хабар берди.
27 февраль куни Ўзбекистон ташқи ишлар вазири Бахтиёр Саидов ундан ишонч ёрлиқ нусхаларини қабул қилди ва ушбу лавозимга тайинлангани билан табриклаб, дипломатик миссиясида муваффақият тилади.
“Нафақат икки томонлама шериклик даражасида, балки минтақавий ҳамкорликни кенгайтиришда ҳам фаол давом этмоқда. Ишончимиз комилки, биргаликдаги саъй-ҳаракатларимиз ҳар икки мамлакат равнақи ва тараққиётига хизмат қилади” деб ёзди Бахтиёр Саидов ўзининг саҳифасида.
Туркиянинг Ўзбекистондаги элчиси лавозимида 2021 йил март ойидан бери Олган Бекар ишлаб келаётган эди. 2025 йил 8 февраль куни Бахтиёр Саидов дипломатик миссиясини якунлаётган Олган Бекар билан учрашиб, Ўзбекистон ва Туркия қардошлик муносабатларини мустаҳкамлашга катта ҳисса қўшгани учун миннатдорлик билдириб, келгуси фаолиятида муваффақиятлар тилаганди.
2025 йил 31 январда Бахтиёр Ибрагимов Ўзбекистоннинг Альбаниядаги биринчи элчиси этиб тайинлангани ҳақида хабар берилган эди. Равшан Усмонов эса Ўзбекистоннинг Исландиядаги (қароргоҳи Лондон шаҳрида жойлашган) элчиси этиб тайинланди ва 7 февраль куни Исландия президенти Халла Томасдоттирга ишонч ёрлиқларини топширди. 11 февраль куни Ўзбекистон элчиси Темур Раҳмонов Литва президенти Гитанас Науседага ишонч ёрлиқларини топширди.
Изоҳ (0)