Ўзбекистоннинг Ислом ҳамкорлик ташкилотидаги доимий вакили, элчи Нодиржон Турғунов ИҲТ бош котиби Ҳусайн Иброҳим Тоҳага ишонч ёрлиқларини топширди. Бу ҳақда “Дунё” АА хабар берди.
ИҲТ бош котиби доимий вакилнинг ишонч ёрлиқларини қабул қилар экан, уни ушбу лавозимга киришиши билан табриклади ва масъулиятли миссиясини амалга оширишда муваффақиятлар тилади.
Учрашувда томонлар Ўзбекистон ва ИҲТ ўртасидаги ҳамкорликнинг ҳозирги ҳолати ва истиқболларини муҳокама қилди. Томонлар, шунингдек, таълим, ёшларни қўллаб-қувватлаш ва инновациялар каби муҳим йўналишларда ўзаро ҳамкорликни фаоллаштиришдан ўзаро манфаатдор эканликларини билдирди.
Бош котиб Ўзбекистоннинг ислом цивилизацияси, илм-фани ва маданияти ривожига қўшган салмоқли ҳиссасини таъкидлаб, мамлакат тарихан ислом оламининг илмий кашфиётлар, фалсафий тафаккур ва маънавий мерос маркази бўлганини алоҳида таъкидлади.
Нодиржон Турғунов 2024 йилнинг март ойида Ўзбекистоннинг Саудия Арабистонидаги элчиси этиб тайинланганди.
Нодиржон Турғунов ҳақида
49 ёшли дипломат Тошкент давлат шарқшунослик институтини (ҳозирги Тошкент давлат шарқшунослик университети) тамомлаган. Меҳнат фаолиятини мактабда ўқитувчиликдан бошлаган, хусусий тузилмаларда таржимон сифатида, шунингдек, Ўзбекистон хорижий мамлакатлар билан дўстлик ва маданий-маърифий алоқалар жамиятлари кенгашида ишлаган.
Изоҳ (0)