Равшанбек Алимов Ўзбекистоннинг Туркманистондаги элчиси этиб тайинланди. Бу ҳақда “Дунё” ахборот агентлиги хабар берди.
Равшанбек Алимов 2020—2024 йилларда Олий Мажлис Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси вазифасида ишлаган.
58 ёшли дипломат Н.Бауман номидаги Москва давлат техника университетини, Ўзбекистон Президенти ҳузуридаги Давлат бошқаруви академиясини, Жоржтаун университетини (АҚШ) тамомлаган.
Меҳнат фаолиятини 1990 йилда вилоят даражасида Ташқи иқтисодий алоқалар вазирлиги тизимида (ҳозирги Инвестисия, саноат ва савдо вазирлиги) бошлаган. Кейин Президент девони, бош вазир котибиятида, Макроиқтисодиёт ва статистика вазирлигида бошқарма бошлиғи лавозимларида ишлаган. 2002—2008 йилларда эса Ўзбекистоннинг Украинадаги элчиси ва ўриндошлик асосида Молдовада элчи, шунингдек, Франциядаги ва ўриндошлик асосида Португалияда элчи бўлиб ишлаган.
Равшанбек Алимов 2008 йилдан буён ТИВ тизимида. Ўтган йиллар давомида Москвадаги элчихонада маслаҳатчи, марказий аппаратда бўлим бошлиғи ва бошқарма бошлиғи лавозимларида фаолият кўрсатган.
2020 йилда у сенатор этиб сайланди. Сенатнинг Халқаро муносабатлар, ташқи иқтисодий алоқалар, хорижий инвестисиялар ва туризм масалалари қўмитаси раиси Равшанбек Алимов 2016—2024 йилларда Ўзбекистоннинг Ашхободдаги элчиси бўлиб ишлаган Акмал Қўчқоров ўрнига тайинланди.
Бундан аввал Қирғизистоннинг Ўзбекистондаги элчиси мамлакатдаги дипломатик миссиясини якунлагани ҳақида хабар берилганди. Шунингдек, Ойбек Шахавдинов Ўзбекистоннинг Черногориядаги биринчи элчиси бўлгани, Ғайрат Фозилов Ўзбекистоннинг Нидерландиядаги элчиси этиб тайинлангани, Нодиржон Турғунов Ўзбекистоннинг Ислом ҳамкорлик ташкилотидаги янги доимий вакили бўлгани маълум қилинганди.
Изоҳ (0)