Украина президенти Владимир Зеленский Миллий хавфсизлик ва мудофаа кенгаши котиби Алексей Даниловни лавозимидан олди. Унинг ўрнига ташқи разведка раҳбари Александр Литвиненко тайинланди. Бу ҳақда “Украинская Правда” хабар берди.
Маълум қилинишича, Литвиненко ўрнига Олег Ивашченко ташқи разведка хизмати раҳбари лавозимини эгаллаган. Украина президенти кадрлар алмашинувига қуйидагича муносабат билдирмоқда:
“Давлатимизнинг бошқарув тизимини янгилашни давом эттирдим. Кадрлар ўзгариши бор. Мен Алексей Даниловдан Украина Миллий хавфсизлик ва мудофаа кенгаши котиби сифатидаги фаолияти учун миннатдорман. У бошқа йўналишга ўтказилмоқда”, — деди Зеленский.
Украина президенти Миллий хавфсизлик ва мудофаа кенгашининг янги котиби Александр Литвиненко “Украина Ташқи разведка хизматига раҳбарлик қилиш тажрибасини янги лавозими олдида турган вазифалар билан бирлаштиришига” умид билдирган.
“Умуман олганда, мен давлатимизнинг жараёнларни прогноз қилиш ва уларга таъсир кўрсатиш бўйича стратегик имкониятлари кучайишини кутаман. Бу давлатимизнинг миллий хавфсизлигига алоқадор”, — деди Зеленский.
Украина президенти Данилов айнан қайси лавозимга ўтказилаётганига аниқлик киритмади. Украина Олий Радаси депутати Алексей Гончаренконинг хабар беришича, Миллий хавфсизлик ва мудофаа кенгашининг собиқ раҳбари Норвегияга элчи этиб тайинланади.
Даниловнинг ўзи Facebook'да ишдан бўшатилганига изоҳ берди. У Зеленскийга ишончи ва Украина фуқароларига давлатга хизмат қилиш имконияти учун миннатдорлик билдирди.
“Украина Миллий хавфсизлик ва мудофаа кенгаши котиби лавозимида тўрт йил, беш ой, 24 кун ишладим. Уялмайдиган кунлар”, — деб ёзади Данилов.
Изоҳ (0)