Ички ишлар вазирлиги Интерпол Миллий марказий бюроси ходимлари катта миқдорда фирибгарлик содир этган шахсни Манагуадан Тошкентга олиб келди. Бу ҳақда бюро матбуот хизмати хабар берди.
Қайд этилишича, мазкур тадбир Ўзбекистоннинг ТИВ, АҚШнинг Анқара, Панама, Мексикадаги божхона ва чегара хизматлари, Россия ИИВнинг Никарагуадаги вакили, АҚШ Давлат департаменти Дипломатик хавфсизлик хизматининг Тошкент, Истанбул, Манагуа, Панама, Мексикадаги хориждаги жиноий ишларни тергов қилиш бўлимлари ҳамкорлигида амалга оширилган.
“Масофа, вақтдаги катта фарқ ва бир қатор сабабларни ҳисобга олиб, жиноятчини транзит қилиш ва ўтказиш бўйича барча тартиблар Бош котибиятнинг Қўмондонлик ва мувофиқлаштириш маркази ва Ўзбекистонда Интерполнинг миллий марказий бюроси томонидан мувофиқлаштирилди”, — дейилади хабарда.
Маълум қилинишича, жуда кўп мамлакатларнинг хизматлари жалб қилинганига унинг изи узоқ Марказий Америкада йўқолгани сабаб бўлган. Гумонланувчи бошқа қитъада яшириниб яна жиноий фаолият – ноқонуний миграция, хорижий фуқароларни Лотин Америкаси давлатлари орқали АҚШга ўтказиш билан шуғулланган.
“Бироқ барча жалб қилинган хизматларни бирлаштириш ва ҳамкорликдаги саъй-ҳаракатлар туфайли гумондор қўлга олинди, тезкорлик билан маълумот алмашиш натижасида фирибгарни судга тортиш ва муносиб жазо белгилаш учун Ўзбекистонга экстрадиция қилиш ва ўтказиш тўғрисида қарор қабул қилинди”, — дея таъкидланади хабарда.
Экстрадиция ҳолатлари
2023 йилнинг март ўрталарида Латвияда ўзини элчихона ходими сифатида таништириб, одамларни чув тушириб юрган Ўзбекистон фуқароси экстрадиция қилингани тўғрисида хабар берилганди. Шунингдек, март охирларида Интерполнинг Ўзбекистондаги Миллий марказий бюроси ходимлари томонидан халқаро қидирувда бўлган шахсни экстрадиция қилиш Швециядан биринчи марта амалга оширилди.
Апрель бошида Москва шаҳрида 13 йил олдин Ўзбекистонда содир этган жинояти учун халқаро қидирувда бўлган шахс қўлга олинганди. Ой ўрталарида бўлса, Қирғизистонда террорчилик ташкилотига аъзоликда гумонланиб, икки ўзбекистонлик ҳибсга олинган эди.
Изоҳ (0)