Исроил ҳарбийлари Иордан дарёсининг босиб олинган Ғарбий қирғоғининг турли ҳудудларида фаластинлик маҳбуслар оилаларининг уйларига бостириб кирди, деб хабар бермоқда Anadolu.
Аниқланишича, ушбу маҳбусларнинг кўпчилиги ўт очишни тўхтатиш келишуви доирасида озод қилиниши кутилмоқда. Гувоҳларнинг хабар беришича, исроиллик ҳарбийлар маҳбусларнинг қариндошларидан уларнинг қамоқхоналардан озод этилишини нишонламасликни талаб қилган.
Хусусан, Исроил армияси ҲАМАС етакчиларидан бири ва маҳбус Жамол ал-Тавилнинг Ғарбий Иордан соҳилининг марказий қисмида жойлашган Ал-Бира шаҳридаги уйига бостириб кириб, унинг оиласига ҳеч қандай тантана ўтказмасликни буюрган.
Маҳбуснинг қизи, журналист Бушра эт-Тавилга кора, исроиллик аскарлар отасининг озод этилиши нишонланса, барча оила аъзоларини қамоққа олиш билан таҳдид солган.
Гувоҳлардан олинган маълумотларга кўра, Исроил армияси яна бир маҳбуснинг яқинлари яшайдиган Рамалланинг шимолида жойлашган Кубар қишлоғидаги уйига ҳам бостириб кирган. Исроил аскарлари эркакнинг оиласига ҳеч қандай тантана уюштирмаслик ҳақида огоҳлантириш берган.
8 февраль куни Исроил армияси уч нафар исроиллик асирнинг озод этилишига жавобан 183 нафар фаластинлик маҳбусни қамоқдан чиқаради. Улардан 18 нафари умрбод, 54 нафари эса узоқ муддатли қамоқ жазосига ҳукм қилинган. Яна 111 нафари 2023 йил 7 октябрда Исроил ҳужумлари бошланганидан кейин Ғазо секторида қўлга олинган фаластинликлардир.
Исроил ва ҲАМАС ўртасида ўт очишни тўхтатиш келишуви ва асирлар алмашинуви
ҲАМАС ва Исроил ўртасида ўт очишни тўхтатиш ва асирларни алмашиш бўйича келишув 19 январь куни кучга кирди.
Асирлар алмашинувининг дастлабки тўрт босқичида Исроил қамоқхоналаридан 583 нафар фаластинлик маҳбус, шунингдек, Ғазо секторидаги 13 нафар исроиллик ва 5 нафар тайлик маҳбус озод қилинди.
Умуман олганда, ўт очишни тўхтатиш тўғрисидаги келишувни амалга ошириш уч босқичда ўтказилади. 42 кун давом этадиган келишувнинг биринчи босқичи доирасида 1900 дан ортиқ фаластинлик ва 33 нафар исроиллик озод қилиниши кутилмоқда.
Изоҳ (0)