Юлдуз Усмоновадан Лободагача: Тошкентда кутилаётган концертларнинг чипта нархи қанча?

Санъат ихлосмандларига қулайлик яратиш мақсадида яқин кунларда бўлиб ўтиши режалаштирилган концерт дастурлари ҳақида маълумот беришга қарор қилдик.

Жамшид Норматов

12 февраль куни «Халқлар дўстлиги» санъат саройида қизиқчи Жамшид Норматов «Янги тошкентлик» номли концерт дастурини тақдим этади. Концерт чипталари 20 000—250 000 сўмгача бўлган нархда сотувга чиқарилган. Концертга оз қолган бўлса-да, чипталарни топиш муаммо эмас.

Имрон

«Ёмон қиз»ни яхши кўрадиган Имрон 13—14 февраль куни «Халқлар дўстлиги» санъат саройида яккахон концерт дастурини ўтказади. Чипталар 20 000—250 000 сўмгача бўлган нархда сотувга чиқарилган. Концерт чипталари деярли сотиб бўлинган, аммо топиш муаммо эмас.

Гала-концерт

Хотин қизлар байрами арафасида кўплаб гала-концертлар ташкил этилади. Улардан бири 28 февраль куни «Халқлар дўстлиги» санъат саройида бўлиб ўтади. Концерт чипталари 30 000—120 000 сўмгача бўлган нархда сотилмоқда. Чўнтагингиз кўтаришига қараб, исталган жойдан чипта харид қилишингиз мумкин. Бу концертга чипта топиш муаммо эмас.

Ғуломжон Ёқубов

Ўзбекистон халқ артисти Ғуломжон Ёқубовнинг бу йилги концерти 1 март куни «Халқлар дўстлиги» санъат саройида бўлиб ўтади. Концерт чипталарини 25 000—250 000 сўмгача бўлган нархда харид қилишингиз мумкин.

Концерт ташкилотчиларининг таъкидлашича, олд қатор чипталари аллақачон сотиб бўлинган. Чунки хонанданинг мухлисларини ёши улуғ инсонлар ташкил этгани боис фарзандлари олд қатор чипталарини совға сифатида харид қилишган. Ҳозирча ўрта ва орқа қатор чипталарини топиш муаммо эмас.

«Сен азиз ва муқаддассан, аёл»

Режиссёр Саъдулла Абдуллаев томонидан 24 йилдан буён ўтказилаётган «Сен азиз ва муқаддассан, аёл» концерт дастури бу йил 3-4-5 март кунлари «Халқлар дўстлиги» санъат саройида бўлиб ўтади. Концерт чипталари 35 000—300 000 сўмгача бўлган нархда сотувга қўйилган. Кечки сеанс чипталари аллақачон сотиб бўлинган. Шу боис ташкилотчилар 4—5 март кунлари кундузги сеансларни ҳам ташкил этишди. Ҳозирча кундузги сеансларга чипталар бор.

Юлдуз Усмонова

Примадоннанинг бу йилги концерти 10—25 март кунлари «Халқлар дўстлиги» санъат саройида бўлиб ўтади. Унинг навбатдаги 16 кунлик концерт дастурига тайёргарликлар авжида. Концерт чипталари 35 000—350 000 сўмгача бўлган нархда сотувга қўйилганди. Аммо кассада ўтирган аёл пастки қаторда чипта қолмаганлигини айтди.

Концерт ташкилотчиларининг айтишича, билетлар уч ой аввал сотувга чиқарилган. Шу боис ҳозир олд ўринлардан чипта топиш муаммо. Аммо сарой атрофидаги «қора бозор»да чипталар ҳамиша топилади. Хусусан, Юлдуз Усмонованинг концерти чипталарини 150 000—500 000 сўмгача бўлган нархда сотиб олишингиз мумкин.

Озода Нурсаидова

Озода Нурсаидова 9—16 май кунлари «Халқлар дўстлиги» санъат саройида «Тасалли бер» номли концерт дастурини ўтказади. Чипталар 25 000—300 000 сўмгача бўлган нархда сотилмоқда. Ҳозирча концертнинг исталган кунига чипта топиш мумкин.

Февраль ва март ойларида кўплаб хориж санъаткорлари ҳам юртимизда меҳмон бўлиб, концерт беришади. Хўш, уларнинг концерт чипталари қанчадан сотиляпти?

Монатикнинг концерт дастури 14 февраль куни Humo Arena’да бўлиб ўтади. Концерт чипталари 80 000—750 000 бўлган нархда сотиляпти.

Лолитанинг концерти эса 16 февраль куни «Туркистон» санъат саройида бўлиб ўтади. Унинг концертига бориш учун чипталарни 150 000—1 200 000 сўмгача харид қилишингиз мумкин.

5 март куни Humo Arena саройида Бастанинг концерт дастури бўлиб ўтади. Чипталар бироз қиммат. Энг арзон чиптани 350 000 сўмга, энг қимматини эса 900 000 сўмга харид қилиш мумкин.

26 март куни Humo Arena саройида Макс Коржнинг концерт дастури бўлиб ўтади. Чипталар 100 000—550 000 сўмгача бўлган нархда сотилмоқда.

28 март куни рус эстрадасининг яна бир вакили Лобода Humo Arena саройида концерт дастурини намойиш этади. Концерт чипталари 50 000—900 000 сўмгача бўлган нархда сотилмоқда.