Икки марта уйланган, халқ артистлари тан олган «Хоразм булбули». Оғабек Собировнинг синовларга тўла ҳаёти ва ижоди ҳақида (фото, видео)

Ўзбекистон халқ артисти Оғабек Собиров 24 июнь куни 50 ёшини қаршилади. Фаолияти давомида 30 дан ортиқ мусиқий альбом, 300 дан ортиқ муаллифлик қўшиқлар ижод қилган Оғабек Собировнинг ижоди ва ҳаёти ҳақида сўз юритамиз.

Оғабек Собиров 1972 йил, 24 июнь куни Хоразм вилояти, Урганч шаҳрида, темир йўлчи Карим ота хонадонида дунёга келган. Илк мусиқий сабоқларни акаси Мақсуд Собировдан олган. 1978 йил 9-ўрта мактабига, 1983 йилда 3-мусиқа мактабига ўқишга киради. Мусиқа мактабидан сўнг Урганч шаҳрида жойлашган санъат коллежида таҳсил олган. Оғабек Собиров кўплаб мусиқий танловларда муваффақиятли иштирок этган.

Филармония биносидан АҚШгача…

Илк яккахон концертини 21 ёшида Филармония биносида тақдим қилган хонанданинг бу борадаги натижалари ҳайратланарлидир. Оғабек Собиров пойтахтда 30 га яқин, вилоят ва туманларда 200 дан ортиқ яккахон концертлар муаллифи бўлган.

Бундан ташқари АҚШ, Германия, Франция, Бельгия, Канада, Туркия, Малайзия, Ҳиндистон, Россия, Эрон, Жанубий Кореа, Венгерия, Қозоғистон, Қирғизистон, Тожикистон, БАА, Исроил, Хитой, Туркманистон давлатларида бир неча мароталаб яккахон концерт дастурларини тақдим этган.

«Хоразм булбули» эътирофидан давлат унвонларигача…

Давлат мукофотидан аввал мухлисларнинг «Хоразм булбули» деган эътирофига муяссар бўлган Оғабек Собиров Ўзбекистонда хизмат кўрсатган артист унвонига 2002 йилда, Ўзбекистон халқ артисти унвонига эса 2020 йилда муносиб кўрилган.

Ўзбекистон халқ артисти унвонини нисбатан кеч олгани ҳақидаги гап-сўзларга хонанданинг ўзи қуйидагича муносабат билдирган эди.

Санъаткор учун унвон «Аввалроқ берилиши керак эди» дейилган гапларни эшитишнинг ўзи катта бахт. Масалан, «Ие, сизга ҳам бердими? Тавба», деса нима қилардим. Унда бу нарсани кераги бўлмасди. Чунки у шараф бўлмайди. Одамларнинг кўзида сохта санъаткор бўлиб гавдаланиб қоласиз.

Оғабек Собиров, Ўзбекистон халқ артисти

Тилла отдан пулчамбаргача…

Одамлар орасида «Туркманистон президенти Оғабек Собировга тилла от совға қилгани учун, уни давлат тадбирларига қўйишмаяпти», деган гап-сўзларга Оғабек Собиров уйдирма, бўлмаган миш-мишлар дея муносабат билдирган эди.

Оғабек Собиров унга қўшиқ қилиб айтиш топширилган шеърни айтмагани учун уни ёқтирмайдиганлар кўпайгани, давлат тадбирларидан четлашиш сабаблари ҳақида шундай дейди:

Бировга ёқиш-ёқмаслик ҳамма даврда ҳам бўлган. Масалан, мени ҳам тўғрисини айтишим керак, ўша пайтда 15-16 йиллар аввал кимларнингдир шеърини айтишим керак бўлди. Шу шеър менга ёқмади, танамга сингдиролмадим. Қўпол қилиб айтганда, ўша шеърни қўшиқ қилиб айтгим келмади. Кейин бу қўшиқ айтилмади, шундан бошланди бу нарса.

Халқимизнинг тўйларида кўпроқ бўламиз, бир-икки кун қолганда «тезда тадбирга етиб келинг», деган давлат чақириқлари бўлиб қолади. Бормасликнинг иложи йўқ, лекин бу ерда тўйга айтилганмиз, ойлаб кутган одамлар бор, одамлар ният қилишади, қанча ҳаракат ва орзу ниятлар билан қилинаётган тўйга бир кун қолганда «Боролмайман», деб айтишни тасаввур қилиб кўринг. Уларни ўрнига ўзингизни қўйиб кўринг. Виждоним қийналарди, тўйни ташлаб, у ерга боролмасдим. Ҳар ким ҳар хил тушуниши мумкин. Биров «Пулни деб, озгина маблағ кўзига яхши кўринди-ю, давлатнинг бепул тадбири кўзига кўринмади», дейиши мумкин, лекин унақа эмас.

Ҳар кимнинг шароити ҳар хил. Камбағал одам ният қилади. Мен боролмасам юзимга шарт айтади: «Ваъда бердингми? Тўйнинг санасини ўзинг белгиладингми? Сўраган пулингни бердимми? Келасан. Тамом».

Хўш нима деб жавоб қайтариш мумкин? Ушбу саволга ҳали ҳанузгача ҳеч кимдан қониқарли жавоб эшитмаганман. Шу нарсалар аста-секин мени давлат тадбирларидан четлашишимга сабаб бўлди деб ўйлайман.

Оғабек Собиров, Ўзбекистон халқ артисти

Оғабек Собиров ўзбек тўйларидаги энг талабгир хонандалардан бири ҳисобланади. 2022 йилда 50 ёшни қаршилаган бўлишига қарамасдан, хонанда ушбу рейтингда пешқадам бўлиб турибди. Уни мухлислари жуда яхши кўради, шу қадар яхши кўришганидан АҚШ долларларидан тайёрланган пулчамбарларни тўйларда унинг бўйнига илиб қўйишади.

Иккинчи марта уйлангани рост, қайнисинглисга уйлангани эса ёлғон…

Оғабек Собировнинг ҳаётида кўпчилик ўйлагандек фақат ютуқлар, ғалабалардан иборат бўлмаган. У ҳаётидаги энг ёмон ҳодиса ҳақида шундай дейди:

Қайнсинглимга уйланмаганман. Аёлим қариндошимиз, тоғамни қизи бўлган. Эсласам бошқача бўлиб кетаман. Ҳаётда энг эзилган даврим, бу даврни эсласам худдики ўша ҳаётга яна қайтгандек бўламан. Ярам янгиланади. Бу ҳаётда менинг юрагимни жароҳатлаган энг катта ҳодиса шу йўқотиш бўлади. Бундай тақдирни ҳеч кимга, ҳеч қачон раво кўрмайман.

Оғабек Собиров, Ўзбекистон халқ артисти

Оғабек Собиров ўзини кино оламида ҳам синаб кўрган. У актёр сифатида «Қизғалдоқ» деб номланган фильмда бош ролни ижро этади. Ушбу фильм ҳам, фильм учун ёзилган махсус қўшиқ ҳам жуда оммалашган. Фильм ҳақида Оғабек Собиров қуйидаги фикрларни айтиб ўтган.

Оиламиздаги мудҳиш воқеа, фарзандларимизнинг онаси оламдан ўтгандан кейин уларни бир умрга эслатиб турадиган ёдгорлик сифатида кино суратга олсак деган маслаҳатлар бўлган. Бу таклифни кутмаган эдим. Ўйлаб қарасам бу ҳам савоб, ибрат бўлади. Микойил Сулаймонов фильм сценарийсини ёзган, Иброҳим Расулов фильмни суратга олган. Бу фильм асосан реал воқеаларга асосланган.

Оғабек Собиров, Ўзбекистон халқ артисти

Халқ артистлари Оғабек Собиров ҳақида, унинг ўзбек санъатида тутган ўрни, салоҳияти ҳақида қуйидаги фикрларини гапириб беришди.

Маълумот учун, Ўзбекистон халқ артисти Оғабек Собиров бугунги кунда «Лазги» бадиий ашула ва рақс ансанбли раҳбари ҳисобланади.