Президент администрацияси Ахборот сиёсати департаментининг собиқ раҳбари Комил Алламжонов ва Истиқболли лойиҳалар агентлиги директори Дмитрий Ли ҳаётига суиқасд буюртмасини кимлар бажаргани маълум бўлди. Бу ҳақда Vzglyad.uz ва Lenta.ru нашрлари ўз манбаларига таяниб хабар берди.
Қайд этилишича, суиқасд ижрочилари Бислан Расаев ҳамда Шамил Темирханов. Улар Чеченистонда яшайдиган икки Россия фуқароси экани аниқланиб, Интерпол қидирувига берилган.
Жиноятчилар Комил Алламжонов ва Дмитрий Лини ўлдириш буюртмасини бажариш мақсадида Ўзбекистон ва Қирғизистон чегараларини ноқонуний кесиб ўтган. Суиқасд иши учун уларга 1,5 миллион АҚШ доллари ваъда қилинган.
Ҳозирга қадар Ўзбекистон ҳуқуқни муҳофаза қилиш органлари Расаев ва Темирхонов бўйича расмий ахборот бергани йўқ.
Маълумот учун, Дмитрий Ли 2017-2022 йилларда Президент ҳузуридаги Лойиҳа бошқаруви миллий агентлигида раҳбарлик лавозимларида фаолият юритган. 2022 йилда Истиқболли лойиҳалар агентлиги директори лавозимига тайинланган.
Комил Алламжоновга уюштирилган суиқасд
26 октябрь тунда Президент администрацияси Ахборот сиёсати департаменти собиқ раҳбари Комил Алламжоновга қуролли ҳужум уюштирилгани ҳақида хабарлар тарқалди. Бош прокуратура берган маълумотга кўра, фуқаро С.С. бошқарувидаги Range Rover русумли автомашина Қибрай тумани, Ифор кўчаси бўйлаб ҳаракатланган вақтида икки нафар номаълум шахс машинага ўқотар қуролдан бир неча маротаба ўқ узиб, номаълум томонга яширинган.
Ҳолат юзасидан Жиноят кодексининг 25, 97-моддаси (қасддан одам ўлдиришга суиқасд қилиш) билан жиноят иши қўзғатилди. Маълумот учун, ушбу ҳолатда жиноят содир этган шахслар 15 йилдан 25 йилгача бўлган муддатда озодликдан маҳрум қилиш орқали жазоланиши мумкин.
27 октябрь куни ушбу жиноятни содир этган шахсларнинг бири аниқланиб, гумонланувчи тариқасида ушланди. 28 октябрь куни яна уч нафар гумонланувчи ушланди. Ноябрь ойида эса суиқасдда гумонланиб яна 5 киши қамоққа олинган.
Комил Алламжонов 2024 йил 30 сентябрда Президент администрацияси Ахборот сиёсати департаментининг раҳбари лавозимини тарк этган эди. У фаолиятини хусусий секторда давом эттиришини маълум қилган.
Изоҳ (0)