Чеченистон раҳбари Рамзан Қодиров Комил Алламжоновга уюштирилган суиқасдга алоқадорлиги ҳақидаги миш-мишларга муносабат билдирди. Бу ҳақда у ўзининг Telegram каналида ёзди.
Бир неча ҳафта олдин Ўзбекистонда президент администрацияси собиқ амалдори бўлган автомобиль ўққа тутилди. Ҳеч ким жабрланмади. Гумонланувчилардан бири аллақачон ҳибсга олинган, тергов барча иштирокчиларни ва суиқасд сабабларини аниқлаши керак.
Бироқ натижаларни кутмасдан, мамлакатдаги ғарбпараст ва баъзи мухолифат ОАВлари “чечен изи” ҳақидаги версияни илгари сурди, кейин эса бу изни менга қаратишди. Мазкур провокацияга жавоб бермоқчи эмасман, деди Қодиров.
У Ўзбекистон президенти Шавкат Мирзиёевнинг сиёсати мамлакатда ахборот ва ҳуқуқни муҳофаза қилиш соҳалари ишини яхши йўлга қўйишга имкон берганини таъкидлади.
Шуни ҳам айтиб ўтишим керакки, агар мен чиндан ҳам бирор нарсани режалаштирган бўлсам, ишни охирига етказган ва юз фоиз натижага эришган бўлардим, деди сиёсатчи.
Қодиров чеченлар ва ўзбеклар қардош халқлар бўлиб, уларни умумий тарихий ўтмиш боғлаб туриши, Ўзбекистон эса шахсан унинг учун отаси, Чеченистон собиқ раҳбари Аҳмад Ҳожи Қодиров ҳаётининг муҳим босқичи билан боғлиқлигини айтди.
Мен бу ахборотни мамлакатларимиз ўртасидаги муносабатларга путур етказишга қаратилган очиқ-ойдин уриниш деб баҳолайман. Ишончим комилки, бундан кейин Ғарб уйдирмалари услубидаги бошқа нашрлар ҳам пайдо бўлади, деб фикр билдирди у.
Қодиров мазкур провокация ортида ким турганини аниқлаш бўйича ишлар олиб борилаётганини таъкидлади.
Президент администрацияси Ахборот сиёсати департаменти собиқ раҳбари Комил Алламжоновга қуролли ҳужум уюштирилгани ҳақида хабар берилганди. Бош прокуратура жиноятни содир этишга алоқадор бўлган шахсларнинг уч нафари ушланганини маълум қилди.
Изоҳ (0)