Oliy sud Allamjonovning 7 nafar xodimi ishini ko‘rib chiqishi haqida xabar berilgandi. Bu bo‘yicha sud jarayoni yakunlanib, sud qarori e’lon qilindi.
Keltirilishicha, Oliy sudda taftish tartibida ko‘rilayotgan Ma’muriy javobgarlik to‘g‘risidagi kodeksning 183-moddasi va 194-moddasi 1-qismida nazarda tutilgan huquqbuzarliklarni sodir etganlikda ayblangan B.Yoqubov va boshqalar (jami 7 kishi)ga nisbatan ma’muriy huquqbuzarlikka oid ish bo‘yicha sud jarayoni yakunlanib, sud qarori e’lon qilindi.
E’lon qilingan sud qaroriga ko‘ra ma’muriy huquqbuzarlik hodisasini tasdiqlovchi dalillar yetarli bo‘lmagani sababl B.Yoqubov, S.Sidikov, A.Qurbonmurodov, A.Tashov, A.Salimov, J.Turg‘unov va X.Zufarovga nisbatan chiqarilgan sud qarorlari bekor qilinib, ma’muriy huquqbuzarlikka oid ish Ma’muriy javobgarlik to‘g‘risidagi kodeksning 271-moddasi 1-bandiga asosan tugatildi.
Ish yuzasidan surishtiruv harakatlarini olib borishda huquqbuzarlik hodisasini tasdiqlovchi dalillarni to‘plash choralarini ko‘rmagan IIB xodimiga nisbatan Ichki ishlar vazirligiga, shuningdek, ishni sudda ko‘rib chiqishda huquqbuzarlik hodisasini tasdiqlovchi dalillar yetarli emasligiga e’tibor bermagan sudyalarga nisbatan Sudyalar malaka hay’atiga xususiy ajrimlar chiqarish yo‘li bilan munosabat bildirildi.
Komil Allamjonovga uyushtirilgan suiqasd
2024-yil 26-oktyabr tunda Komil Allamjonovga qurolli hujum uyushtirilgani haqida xabarlar tarqaldi. Bosh prokuratura bergan maʼlumotga ko‘ra, fuqaro S.S. boshqaruvidagi Range Rover rusumli avtomashina Qibray tumani, Ifor ko‘chasi bo‘ylab harakatlangan vaqtida ikki nafar nomaʼlum shaxs mashinaga o‘qotar quroldan bir necha marotaba o‘q uzib, nomaʼlum tomonga yashiringan.
Holat yuzasidan Jinoyat kodeksining 25, 97-moddasi (qasddan odam o‘ldirishga suiqasd qilish) bilan jinoyat ishi qo‘zg‘atildi. 27-oktyabr kuni ushbu jinoyatni sodir etgan shaxslarning biri aniqlanib, gumonlanuvchi tariqasida ushlandi. 28-oktyabr kuni yana uch nafar gumonlanuvchi ushlandi. Noyabr oyida esa suiqasdda gumonlanib yana 5 kishi qamoqqa olindi.
27-dekabr kuni Bosh prokuratura Komil Allamjonovga nisbatan sodir etilgan qotillikka suiqasd qilish bilan bog‘liq jinoyat ishi doirasida Chechenistonda yashaydigan ikki Rossiya fuqarosi — Bislan Rasayev va Shamil Temirxanov Jinoyat kodeksining tegishli moddalari bilan sirtdan ayblanuvchi tariqasida jalb qilinganini e’lon qildi.
Ular qonunga xilof ravishda O‘zbekistonga kirish va chiqish, jinoyat haqida xabar bermaslik hamda o‘qotar qurolning qonunga xilof muomalasi kabi jinoiy harakatlarni sodir etgani aniqlangan. Ularga nisbatan qamoqqa olish tarzidagi ehtiyot chorasi qo‘llangan holda qidiruv e’lon qilingan.
10-yanvar kuni inson huquqlari faoli Abdurahmon Tashanov Komil Allamjonovga suiqasd ishi yuzasidan harbiy sudda mahkama boshlanganini ma’lum qildi.
2025-yil 12-fevral kuni Komil Allamjonovga suiqasd bo‘yicha 10 kishiga nisbatan sud hukmi e’lon qilingan. E’lon qilingan sud hukmiga muvofiq Komil Allamjonovga suiqasd tashkilotchiligida ayblangan Javlon Yunusovga 18 yil-u 6 oy, Shuhrat Rasulov, Shohrux Ahmedov va Ismoil Jahongirovga 23 yil, Doniyor Toshxo‘jayevga esa 7 yil muddatga ozodlikdan mahrum qilish jazosi tayinlandi.
Qolgan 5 nafar sudlanuvchiga qilmishiga muvofiq ravishda turli muddatlarga ozodlikdan mahrum qilish jazolari tayinlandi.
Komil Allamjonov Telegram sahifasida post qoldirib, haqiqat hech qachon sinmasligi, baribir yuzaga chiqishini aytib o‘tdi.
Izoh (0)