Ўзбекистонда солиқ маъмуриятчилигидаги уч босқичли жарима қўллаш тартиби бекор қилинмоқда. Бу ҳақда Сенат ахборот хизмати хабар берди.
Сенатнинг навбатдаги ялпи мажлисида “Солиқ маъмуриятчилиги такомиллаштирилиши, шунингдек, солиққа оид ҳуқуқбузарликлар учун жавобгарлик ва валютани тартибга солиш либераллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун муҳокама қилинди.
Амалдаги тартибга кўра тадбиркорлик субъектлари айни бир ҳуқуқбузарлик учун бир неча маротаба жавобгарликка тортилади. Жумладан, тадбиркорлар ходимлар сонини яширганлик, товарларни мажбурий рақамли маркировкалаш қоидаларини бузганлик ва фискал белгиларни акс эттирмаганлик каби айнан бир ҳуқуқбузарлик учун ҳам молиявий жаримага, ҳам маъмурий жаримага тортилиши мумкин.
Қайд этилишича, ушбу ҳолатларнинг олдини олиш мақсадида солиқ маъмуриятчилигининг янада такомиллаштирилишига қаратилган ўзгартиришлар киритиш, шунингдек, ташқи савдо операциялари бўйича активларнинг қонунда белгиланган муддатларда репатриация қилинишини таъминлашга оид талабларни қайта кўриб чиқиш зарурати юзага келмоқда.
Юқоридаги ҳолатларни бартараф этиш мақсадида ушбу ҳолатларда қўлланадиган уч босқичли 50 фоизлик жарима қўллаш тартиби бекор қилинмоқда. Унинг ўрнига қайтмаган активларнинг 20 фоизи миқдорида бир марталик молиявий жаримани қўллаш тартиби жорий этилмоқда.
Ушбу қонунда лойиҳалаштириш, асбоб-ускуналар ва эҳтиёт қисмларни етказиб бериш, асбоб-ускуналарни ўрнатиш ҳамда қурилиш-монтаж ишлари билан боғлиқ бўлган ишларни бажариш (хизматларни кўрсатиш) юзасидан инвестиция лойиҳалари доирасида тузилган контрактларда белгиланган муддат 180 кундан ортиқ бўлса, мазкур контрактдаги муддатлар қўлланиши назарда тутилмоқда.
Муҳокама қилинган қонун билан солиқ соҳасидаги ҳуқуқбузарликлар учун қўлланадиган ҳуқуқий таъсир чораларининг ҳуқуқбузарлик ҳаракатига мутаносиблигини таъминлаш орқали тадбиркорлик субъектлари айнан бир ҳуқуқбузарлик учун бир неча маротаба жавобгарликка тортилишининг олдини олиш белгиланмоқда.
Таъкидланишича, қонуннинг қабул қилиниши натижасида солиқ маъмуриятчилиги янада такомиллаштирилиб, нормалар амалиётда икки хил талқин қилинишининг олди олинади ва бир хилда қўлланиши таъминланади.
Шунингдек, солиққа оид ҳуқуқбузарликлар учун жавобгарлик чоралари либераллаштирилади, бу ўз навбатида тадбиркорлик субъектларининг ҳуқуқлари самарали ҳимоя қилинишига ҳамда ортиқча харажатлари камайтирилишига хизмат қилади.
Муҳокамадан сўнг мазкур қонун сенаторлар томонидан маъқулланди.
Бундан аввал томорқасини қаровсиз қолдирган хонадон эгалари энди уч карра юқори солиқ тўлаши ҳақида хабар берилганди. Шунингдек, Ўзбекистонда паррандачилик билан шуғулланувчи тадбиркорларни ер солиғидан озод этиш таклиф қилинмоқда.
Бундан ташқари, Ўзбекистонда хуфиёна фаолият юритиб, “конвертда” ойлик тўлаётган тадбиркорлар устидан назорат кучайтирилиши айтилганди.
Изоҳ (0)