Ўзбекистондаги энг кўп имтиёз олган корхоналар очиқланди

Коррупцияга қарши курашиш агентлиги Ўзбекистонда ташкилотларнинг 2024 йил I ярим йиллик якуни бўйича солиқ ва божхона имтиёзларидан фойдаланганлик ҳолатини таҳлил қилди.

Унга кўра, I ярим йиллик якуни бўйича фойдаланилган умумий солиқ ва божхона имтиёзлари жами 63,4 триллион сўмни ташкил этган. Яъни, давлат томонидан яратилган имкониятлар ва берилган имтиёзлар натижасида шунча маблағ корхона ва ташкилотлар ихтиёрига қолдирилган. 2023 йилда бу кўрсаткич 127,1 триллион сўмни ташкил этган.

Солиқ имтиёзларидан 132 059 та ташкилот фойдаланган, қўлланган жами имтиёз суммаси 39 триллион сўмни, қўлланган солиқ имтиёзларининг 82,2 фоизи ёки 32,1 триллион сўми қўшилган қиймат солиғи (16 триллион сўми ҚҚСдан нол даражали ставка) ҳисобига тўғри келади.

Навоий кон-металлургия комбинати АЖ, Олмалиқ кон-металлургия комбинати АЖ ҳамда банк-молия ташкилотларидан ташқари, энг йирик имтиёздан фойдаланган ташкилотлар қаторидан қуйидагилар ўрин олган:

• Uzbekistan Airways АЖ — 881,4 млрд сўм;
• “Навоийуран” ДК — 581,4 млрд сўм;
• “Ўзбекистон темир йўллари” АЖ — 529,6 млрд сўм;
• Asia Trans Gas МЧЖ — 453,7 млрд сўм;
• UzAutoMotors АЖ — 281,8 млрд.сўм;
• Uz-Kor Gas Chemical МЧЖ ҚК — 224,3 млрд сўм;
• Uzcard — “Ягона умумреспублика процессинг маркази” АЖ — 145,7 млрд сўм;
• Uzbekistan Airports АЖ — 145,1 млрд сўм;
• “Ўзбектелеком” АЖ — 131,2 млрд сўм;
• “Ўзбекистон миллий электр тармоқлари” АЖ — 121,4 млрд сўм;
• “Ислом Каримов номидаги Тошкент халқаро аэропорти” МЧЖ — 116,9 млрд сўм.

Божхона имтиёзлари (божхони йиғими, божи, акциз ва қўшилган қиймат солиғи)дан 10 454 та корхона фойдаланган бўлиб, қўлланган жами имтиёз суммаси 24,4 триллион сўмни ташкил этди.

Олмалиқ кон-металлургия комбинати АЖ ҳамда банк-молия ташкилотларини ҳисобга олмаганда, энг йирик имтиёздан фойдаланувчи ташкилотлар қаторидан қуйидагилар ўрин олди:

• UzGasTrade — 1,07 трлн сўм;
• ОКМК — 344,3 млрд сўм;
• “Ўзбектелеком” — 300,6 млрд сўм;
• АCWА Power Dzhankeldy Wind — 277,1 млрд сўм;
• BYD Uzbekistan Factory — 274,4 млрд сўм;
• АCWА Power Bash Wind — 273,8 млрд сўм;
• Enter Engineering, Олмалиқ ПУ — 266,7 млрд сўм;
• Panorama Airways — 240,2 млрд сўм;
• Enter Engineering, Бойсун ГҚИЗ — 203,9 млрд сўм;
• Uzbekistan Airways — 196 млрд сўм;
• ADM Jizzakh — 158,6 млрд сўм

Бир вақтнинг ўзида ҳам солиқ ҳам божхона имтиёзларидан фойдаланган ташкилотлар сони 4 630 тани ташкил этиб, қўлланган имтиёз суммаси 39,3 триллион сўмни ташкил этган. 

Қўлланган имтиёзлар суммаси 100 миллиард сўмдан ортиқ бўлган солиқ тўловчилар рўйхати билан қуйидаги ҳавола орқали танишиш мумкин. Улар орасида UzAutoMotors, BYD Uzbekistan Factory, ADM Jizzakh автомобиль заводи, Enter Engineering, Бойсун ГҚИЗ, DM Enter Engineering Ptе Ltd, Uzbekistan Airways, Uzbekistan Airports кабилар бор.