Шимолий Атлантика альянси НАТОга қарши сўнгги йилларда амалга оширилган қўпорувчилик режалари саноат раҳбарлари, хусусан, Германиянинг Rheinmetall қурол-яроғ концерни раҳбарига суиқасдларни ўз ичига олганини тасдиқлади.
Европарламентда сўзга чиққан НАТО бош котибининг инновациялар, гибрид ва кибертехнологиялар бўйича ўринбосари Жеймс Аппатурай Rheinmetall бош директори Армин Паппергер хавф остида қолганини тасдиқлади.
Аппатурайнинг сўзларига кўра, қўпорувчилик доирасида ўт қўйишлар, темир йўлларда авариялар, сиёсатчиларнинг мулкига ҳужумлар, саноат соҳасидаги етакчиларга, хусусан, Rheinmetall раҳбарига суиқасдлар режалаштирилган.
2024 йилнинг июль ойида CNN телеканали Паппергерни ўлдириш учун уюштирилган фитна Россия ҳукумати томонидан Украинани қўллаб-қувватлаган Европа давлатлари мудофаа саноати раҳбарларини йўқ қилиш бўйича режалаштирилган тадбирлардан бири бўлгани ҳақида хабар берган эди.
Аппатурай ўтмишда Ғарб энг юқори даражадаги “қизил чизиқлар”ни ўрнатиш орқали Россия томонидан қўпорувчиликнинг олдини олишга муваффақ бўлганини қайд этди.
Аппатурайнинг таъкидлашича, Ғарб НАТО рекорд даражадаги деб таърифлаётган қўпорувчиликнинг ҳозирги даражасини нормал деб ҳисоблай олмайди. Унинг қўшимча қилишича, блокдаги иттифоқчилар Болтиқ денгизидаги такрорланувчи воқеаларга қарши курашда “қатъийроқ бўлиш” зарурлигини тушунишади.
Аппатурай альянсга бундай ҳолларда олти ёки етти ой давом этиши мумкин бўлган терговнинг тугашини кутмасдан чоралар кўришни таклиф қилди.
10 триллион долларлик иқтисодий фаолият сув ости кабеллари орқали амалга оширилади, улардан тўрт триллиони Атлантика океани тубидаги кабеллар орқали ўтади. Агар улар шикастланса, иқтисодий зарар жуда катта бўлади, дея огоҳлантирди Аппатурай.
Изоҳ (0)