Ўзбекистонда банклар автокредит беришда автомобилларга чегирмаларни ҳисобга олишни бошлайди. Бу ҳақда 7 февраль куни хизмат кўрсатиш соҳаларини ривожлантириш бўйича асосий вазифалар муҳокамаси юзасидан Шавкат Мирзиёев раислигидаги видеоселектор йиғилишида айтилди.
Кўплаб автосалонлар автомобиль хариди учун пул тўлиқ тўланса чегирма бермоқда. Лекин амалдаги қоидаларга кўра, кредитга бериладиган автомашина учун бу чегирмани банклар қабул қилмайди. Агар банкларга чегирма қабул қилишга рухсат берилса, кредит ставкаси 4 фоизга арзонлашади.
Президент бу чекловни маҳаллий автомашиналар учун бекор қилиш муҳимлигини айтди.
Шунингдек, йиғилишда қайд этилишича, хизматлар кўламини кенгайтириш учун такси агрегаторларидан бири 2 мингта автомобиль кредитига кафил бўлиб, 4 минг одамни ишли қилиш таклифи билан чиққан. Бунинг ҳисобига янги замонавий таксилар кўпаяди. Бундай лойиҳаларга банклар 1 триллион сўм кредит ажратишга тайёр.
Умуман, бу йил транспорт хизматлари ҳажмини 15 фоизга ошириб, 185 триллион сўмга, экспортини 2,2 миллиард долларга олиб чиқиш зарурлиги кўрсатиб ўтилди.
Ўзбекистонда 2024 йил 1 июлдан бошлаб аҳолига кредит бериш талаблари кучайтирилган. Марказий банк қарз юки кўрсаткичини жорий этди, у ўртача кредит тўловларининг қарз олувчининг ўртача ойлик даромадига нисбати орқали ҳисобланади. Барча кредитларни (шу жумладан, микрокредитларни) беришда кредиторлар ўз мижозларининг қарз юки 60 фоиздан ошмаслигини таъминлаши шарт.
Изоҳ (0)