Навоий вилоятида фуқаро тўрт туп дарахтни ноқонуний кесгани учун 52 млн 500 минг сўм тўлади. Бу ҳақда вилоят Экология бошқармаси хабар берди.
Қайд этилишича, Навоий вилояти Экология бошқармасининг тезкор назорат гуруҳи ходимлари томонидан Қизилтепа туманидаги Тўдакўл дам олиш маскани ҳудудида назорат рейд тадбири ўтказилди.
Рейд тадбири давомида Кармана туманида яшовчи ҳуқуқбузар О.С томонидан Тўдакўл дам олиш маскани ҳудудида икки туп жийда, бир туп қайрағоч ва бир туп айлант дарахтларини ҳеч қандай рухсатсиз таг қисмидан кесиб ташлангани аниқланди.
Мазкур ҳолат бўйича ҳуқуқбузарга нисбатан Маъмурий жавобгарлик тўғрисидаги кодекснинг 79-моддаси 1- қисми билан маъмурий баённома расмийлаштирилиб, 9 миллион 375 минг сўм жарима ҳамда 43 миллион 125 минг сўм табиатга етказилган зарар белгиланди.
Аёвсиз кесилаётган дарахтлар
Тошкент вилоятида 2 туп кўп йиллик чинорни кесган шахс табиатга 199 млн сўм зарар етказгани ҳақида хабар берилганди. Хоразмда 4 туп павловния дарахтини кесган шахс 27 млн сўмдан ортиқ жаримага тортилганди.
Шунингдек, Сурхондарёда автомобиль йўлларини реконструкция қилишда қарийб 9,5 минг туп дарахт кўчирилиши мумкинлиги айтилганди. Шу билан бирга, Тошкент вилоятида 4 туп ёнғоқ дарахтини кесган шахс табиатга 247 млн сўм зарар етказганди.
Бундан ташқари, Жиззахда тут дарахтлари кесилиши оқибатида ўсимлик дунёсига 738 млн сўмлик зарар етказилган.
Изоҳ (0)