Германия қуролли кучлари украиналик аскарлар ўқитилаётган ҳарбий база устида аниқланган шубҳали дронлар бўйича тергов бошлади. Der Spiegel нашрига кўра, гап Швесингдаги ҳарбий-ҳаво кучлари базаси ҳақида бормоқда.
Швесингдаги ҳаво кучлари базаси. 2012 йил
Бу ҳақда биринчилардан бўлиб ёзган Süddeutsche Zeitung газетасининг Бундесвер ички ҳисоботига таяниб хабар беришича, январь ойида мазкур база устида олти марта номаълум дронлар кузатилган. Германия армияси махсус электрон уруш қуролларидан фойдаланишига қарамай, уларни қўндириш ёки бошқарувчини аниқлашнинг имкони бўлмаган. Бу эса, ўз навбатида, Бундесвернинг мудофаа чоралари ҳақида айрим саволларни пайдо қилган.
Мамлакат казармалари ва ҳарбий саноат корхоналари устида дронлар аниқланиши янгилик эмас. Бундай ҳолатлар тез-тез юз бериб туради. Германия расмийлари, шунингдек, мутахассислар бунинг ортида Россия турганига ишонишади.
Швесингдаги база стратегик объектлардан биридир. Боиси Германия, Киевнинг энг қалин иттифоқчиларидан бири ўлароқ, украиналик аскарларни Patriot ҳаво мудофаа тизимларини бошқаришга ўқитади. Айни шу сабаб ҳам Украина билан кенг кўламли уруш олиб бораётган Россия гумонланувчилар рўйхатида биринчи ўринни банд этган.
Германия Украинанинг Қўшма Штатлардан сўнг энг йирик донори ҳисобланади. Мамлакат иттифоқчисига биргина 2024 йилнинг ўзида 7,1 миллиард евро ҳарбий ёрдам кўрсатган. У Patriot, IRIS-Т ҳаво мудофаа тизимлари, Леопард 2 танклари ва бошқаларни ўз ичига олади.
Изоҳ (0)