Шов-шувли суд ишлари ва ажрим воқеаларидан кейин актёр Бред Питт биринчи марта собиқ турмуш ўртоғи Анжелина Жоли билан боғланиб, фарзандлар учун яна муросага келишга интилмоқда. Бу ҳақда Корреспондент хабар берди.
Radar Online нашри маълумотларига кўра, қисқа вақт ичида икки марта йўл-транспорт ҳодисасига учраган ўғли Пакс билан боғлиқ вазият Питтни хавотирга солмоқда. У фарзандига ҳам ота, ҳам онанинг меҳри ва қўллаб-қувватлаши бирдек муҳим эканини қайд этган:
“Бред фарзандларининг ҳаётига қайтишни истайди ва Пакснинг саломатлигидан жуда хавотирда. Шунинг учун у Анжелина билан боғланди. Агар Пакс шундай ҳолатда улов минишда давом этаверса, жиддий автофалокатга тушиб қолишидан хавотирда”, деди инсайдер.
Маълумотларга кўра, Питт ҳали ҳам Жолидан ранжиган, чунки актриса унга болалар тарбиясида фаол иштирок этишга рухсат бермаяпти. Бред эса барча кўнгилсиз ҳолатларга қарамай, биргаликда болаларга ғамхўрлик қилиш ҳар томонлама фойдали бўлишига ишонади.
Фото: Newsweek
“Бред Питтнинг фикрича, агар актёрга қўшма васийлик берилганида эди, вазият бошқача тус олар эди. Пакснинг ўсмирлик йиллари отасидан узоқда ўтди. Бу давр ўғил боланинг йигитлик пайтига ўтишида муҳим аҳамият касб этади. Пакснинг ҳаётида кучли эркак намунаси керак эди, лекин Бредга бу ролни бажаришга рухсат берилмаган. Бу унинг ғазабини келтиради”, дея қўшимча қилади инсайдер.
Маълумот учун, 2019 йилда Анжелина Жоли ва Бред Питт расман ажрашди. Собиқ жуфтликнинг олти нафар фарзанди бор. Улар фарзандлари Меддокс, Пакс Тен ва Захарани асраб олган. Шайло, эгизаклар Нокс ва Вивен эса жуфтликнинг биологик фарзанди ҳисобланади. “Мен Бред Питт билан оилам фаровонлиги учун ажрашдим. Бу тўғри қарор эди. Бугунги кунгача болаларимнинг тинч ҳаёт кечиришига эътибор қаратмоқдаман”, деган эди актриса.
Изоҳ (0)