Turkmanistonda ajralishni rasmiylashtirish uchun davlat boji besh baravar oshdi. Bu haqda Ozodlik radiosi xabar berdi.
Bu fuqarolarining ajrashishni keyinroqqa qoldirishga majbur qilmoqda.
“Nikohni bekor qilish to‘g‘risidagi ariza bilan sudga kim murojaat qilishidan, erkak yoki ayol bo‘lishidan qat’i nazar, ulardan 6000 manat (3 500 dollardan ortiq) miqdorida davlat boji to‘lash talab qilinmoqda”, deydi ashxobodlik ayol.
Taxminan olti oy oldin boj miqdori 1200 manat (salkam 706 dollar) edi. Fuqarolarga bojlar qachon oshirilgani haqida aniq tushuntirish berishmagan.
“Ular faqat fuqarolarning ishlari to‘lovdan keyingina ko‘rib chiqilishini aytmoqda”, deydi Ashxobodning yana bir aholisi.
Nikohni bekor qilish tartibi Turkmaniston Oila kodeksining 5-bobida belgilangan. Agar er-xotindan biri ajrashishga rozi bo‘lmasa yoki oilada voyaga yetmagan yoxud mehnatga layoqatsiz farzandlar bo‘lsa, ajrashish ariza beruvchining yashash joyidagi tuman (shahar) sudi tomonidan amalga oshiriladi.
Nikohdan ajratish er-xotinning birgalikdagi arizasi asosida, ariza berilgan kundan e’tiboran ikki oy o‘tgach, FHDY organi tomonidan amalga oshiriladi. Turkmanistonda iqtisodiy qiyinchiliklar va keng tarqalgan ishsizlik sharoitida nikohni bekor qilishga qaror qilgan ko‘plab fuqarolar 5 baravar qimmatlashgan davlat bojini to‘lay olmayapti.
“Nikohni bekor qilish to‘g‘risidagi ariza bilan sudga murojaat qilgan ko‘plab er-xotinlar davlat bojini to‘lash uchun zarur bo‘lgan mablag‘ni yig‘maguncha ajrashishni kechiktirishga majbur. Chunki odamlar oyiga 1500-2000 manatdan (salkam 900-1200 dollar) oladi va zo‘rg‘a kun kechirmoqda”, deydi ashxobodlik anonim manba.
Ta’kidlanishicha, so‘nggi yillarda ajrashishga qaror qilgan oilaviy juftliklar soni sezilarli darajada oshib bormoqda va aksariyat hollarda bunday oilalar Turkiya yoki Rossiyada mehnat migratsiyasida bo‘lib turibdi.
Izoh (0)