Бирлашган Миллатлар Ташкилоти Ғазо секторидаги Исроил геноциди бўйича махсус ҳисоботини тақдим этди

Бирлашган Миллатлар Ташкилотининг Фаластин ҳудудларидаги инсон ҳуқуқлари бўйича махсус маърузачиси Франческа Альбанезе ҳисобот тақдим этди.

Ҳисоботда у Исроилнинг Ғазо секторидаги ҳаракатларини геноцид деб атади. БМТ материалида айтилишича, Исроил вакиллари ҳисобот муҳокамасида иштирок этмаган. Шу билан бирга, учрашувдан сўнг, улар Франческа Альбанезе материалини бутунлай рад этган пресс-релизни эълон қилишди.

Франческа Альбанезенинг фикрича, БМТ резолюцияси қабул қилингандан кейин реалликни инкор этиш ва Исроил расмийларини жазоламаслик нотўғри йўл бўлади.

Исроил учта геноцид ҳаракатини амалга оширди: жиддий жисмоний ёки руҳий зарар етказиш, қасддан тўлиқ ёки қисман жисмоний ҳалокатга олиб келадиган ҳаёт шароитларини яратиш ва туғилиш даражасини пасайтиришга қаратилган ҳаракатларни амалга ошириш, — деди Альбанезе Инсон ҳуқуқлари кенгашига.

Махсус маърузачининг қўшимча қилишича, фаластинликларга нисбатан зулм жараёни 76 йилдан ортиқ давом этган. У Исроилга қарши санкциялар ва қурол эмбаргосини жорий этишга чақирди.

25 март куни БМТ Хавфсизлик кенгаши Ғазо секторида рамазон ойи учун ҳарбий ҳаракатларни тўхтатишни талаб қилувчи резолюцияни қабул қилди, бу эса барқарор сулҳга олиб келиши мумкин эди. Шунингдек, резолюцияда барча гаровга олинганларни озод қилиш ва инсонпарварлик ёрдами ҳажмини ошириш зарурлиги ҳақида сўз боради.