Бирлашган Миллатлар Ташкилотининг Инсон ҳуқуқлари кенгаши Исроилни Ғазо секторидаги инсон ҳуқуқларини бузгани учун жавобгарликка тортишга чақирувчи резолюцияни қабул қилди. Резолюция Покистон томонидан тақдим этилган. Исроилнинг БМТдаги доимий вакили Мейрав Эйлон Шахарнинг айтишича, қабул қилинган ҳужжат бутун ташкилотнинг обрўсига соя солади.
“Босиб олинган Фаластин ҳудуди, жумладан, Шарқий Қуддусдаги инсон ҳуқуқлари аҳволи, шунингдек, жавобгарлик ва адолатни таъминлаш бўйича мажбуриятлар тўғрисида резолюция лойиҳаси қабул қилинди”, — дея хабар берди БМТнинг Инсон ҳуқуқлари бўйича қўмитаси.
Резолюцияни аъзо 28 давлат қўллаб-қувватлади. 13 аъзо бетараф, 6 аъзо, жумладан, АҚШ ва Германия қарши овоз берди. Покистоннинг БМТдаги доимий вакили Билол Аҳмаднинг айтишича, “лойиҳа босиб олинган Фаластин ҳудудида, хусусан, Ғазо секторида инсон ҳуқуқларининг қўпол бузилишига жавоб тариқасида ишлаб чиқилган”.
“Ушбу кенгаш ва унинг кўплаб аъзолари учун муҳим бўлган нарса Исроилни қоралаш, ягона яҳудий давлатини танқид қилиш ва ҲАМАС, Фаластин маъмурияти ва мамлакатимизни йўқ қилмоқчи бўлганларнинг барчасини ҳимоя қилишдир. Бу резолюция Инсон ҳуқуқлари кенгаши ва бутун БМТнинг обрўсига соя солади”, деди Исроилнинг БМТдаги доимий вакили.
Шунингдек, у Бельгия, Финляндия ва Люксембург каби баъзи Европа давлатлари бу резолюцияни қўллаб-қувватлаганидан ҳафсаласи пир бўлганини таъкидлади.
Бундан ташқари, бугун БМТ Инсон ҳуқуқлари бўйича комиссияси ҳам Фаластин халқининг ўз тақдирини ўзи белгилаш ҳуқуқи тўғрисида резолюция қабул қилди. АҚШ Парагвай билан бирга унга қарши овоз берди. Альбания, Аргентина ва Камерун бетараф қолди, қолган ҳамма ҳужжатни қўллаб-қувватлади.
Бир кун олдин президент Жо Байден Исроил бош вазири Биньямин Нетаньяху билан телефон орқали гаплашди. Оқ уй веб-сайтида эълон қилинган хабарга кўра, суҳбатда Жо Байден АҚШнинг Ғазодаги урушни келажакда қўллаб-қувватлаши учун Исроил тинч аҳоли ва гуманитар ходимларни ҳимоя қилиш бўйича янги қадамлар қўйиши шарт эканлигини айтиб ўтди.
Изоҳ (0)