Россия армияси Одесса марказига ракета зарбалари берди. Шаҳарнинг UNESCO томонидан ҳимояланадиган марказида жойлашган тарихий бинолар авиаҳужумлар оқибатида жиддий зарар кўрди. Дастлабки маълумотларга кўра, Россия ҳаво ҳужумидан мудофаа воситалари билан тутиб олиш қийин бўлган Искандер типидаги баллистик ракеталардан фойдаланган.
Украина президенти Владимир Зеленский ушбу ҳужум мамлакатнинг ҳаво мудофаасини кучайтириш зарурлигини яна бир бор кўрсатиб берганини таъкидлади. Сўнги маълумотларга кўра, ҳужумлар оқибатида 4 киши ҳалок бўлган.
Одесса вилояти ҳокими Олег Кипер бомбардимон оқибатида етти киши жароҳатланганини ва ҳодиса жойида қутқарув хизматлари ишни давом эттираётганини маълум қилди.
-U0yHXro_.jpg)
ОАВларда эълон қилган суратларда ХIX асрга тегишли меъморий ёдгорлик ҳисобланган Бристол меҳмонхонасининг вестибюли ва бошқа қисмлари вайрон бўлганини кўриш мумкин.
Меҳмонхона қаршисида жойлашган Одесса филармонияси концерт зали ҳам шикастланган — бино ойналари синиб кетган. Мазкур ҳудуддаги музейлар ҳам зарар кўрган.
-40hpFeA2.jpg)
Кипер портлашлар оралиқ билан уч марта содир бўлганини таъкидлади. Унинг сўзларига кўра, бу Россия армиясининг бир хил нишонга такрорий зарба бериш бўйича “ишлаб чиқилган пухта тактикаси”дир.
Бу сафар бетонни тешиб ўтишга қодир ракета ишлатилган, деди у.
Вилоят ҳокимининг таъкидлашича, ҳужумнинг мақсади фуқаролик меҳмонхонаси бўлган. Унга ички тўсиқлар ва иншоотларни бузиш мақсадида зарба берилган, бу эса жиддий шикастланишлар ва, албатта, ҳужум пайтида у ерда бўлган одамлар орасида қурбонлар бўлишига олиб келган.
Украина етакчиси ўзининг видеомурожаатида ҳужум “тўғридан-тўғри шаҳарга, оддий фуқаролар биноларига” қаратилганини айтди.
Ҳаво ҳужумидан ҳимояланиш яна бир бор энг устувор вазифа бўлиб қолмоқда. Биз мамлакатимизни яхшироқ ҳимоя қилиш учун барча ҳамкорларимиз билан ишлаяпмиз, деб таъкидлади у.
Изоҳ (0)