Россия армияси 17 ноябрь оқшомида Суми шаҳрининг аҳоли зич жойлашган микрорайонига ракета ҳужуми уюштирди. Отилган ракеталардан бири тўққиз қаватли турар жой биносига келиб урилган.
Украина Ички ишлар вазирлигининг хабар беришича, зарба натижасида 11 киши, жумладан, икки нафар бола ҳалок бўлган.
Суми шаҳар кенгаши маълумотларига кўра, 89 киши, жумладан, 11 нафар бола жароҳатланган. 37 нафар ярадор шифохоналарда қолмоқда. Ракета ҳужумига учраган ҳудуддан 400 га яқин аҳоли эвакуация қилинган.
Ҳаммаси бўлиб, ўнта кўп қаватли уй ва автомобилларга зарар етган, дея хабар беради Украина прокуратураси.
Шаҳар мери вазифасини бажарувчи Артём Кобзар Россия қўшинлари Сумига ҳужум қилиш учун баллистик ракеталардан фойдаланганини айтган.
Суми вилоятида бир кечада Россиядан жами ўнта авиазарба қайд этилган, камида 26 та портлаш овози эшитилган. Россия армияси турар жой биносига зарба бергач, шаҳарнинг муҳим инфратузилмасига навбатдаги авизарба уюштирган. Ҳужум оқибатида Суми электр энергиясидан тўлиқ узилган.
Қурбонлар хотирасига Сумида 18 ва 19 ноябрь кунлари мотам эълон қилинди.
“Сумидаги тўққиз қаватли бинога ракета зарбаси берилди, барча зарур хизматлар ҳозирда амалга оширилмоқда, уларнинг оилалари ва яқинларига ҳамдардлик билдираман”, деб ёзди Украина президенти Владимир Зеленский Telegramдаги каналида.
Россия армияси 19 сентябрь куни Украинанинг Суми шаҳридаги 200 дан ортиқ қария яшайдиган пансионатга зарба берган эди.
Ҳодиса оқибатида 13 киши жароҳатланган, камида бир киши ҳалок бўлган, 147 киши хавфсиз жойга кўчирилган. Ҳужум вақтида муассасада 221 нафар бемор бўлган, улардан 87 нафари тўшакка михланган беморлар ҳисобланган.
Бундан ташқари, 60 нафар хизмат кўрсатувчи ходим, яъни жами 300 га яқин киши бўлган. Улар тушлик қилаётганида, айримлари дам олаётганида пансионатга зарба берилган.
Изоҳ (0)