Хитойдаги давлат оммавий ахборот воситалари COVID-19 коронавирус инфекциясининг пайдо бўлиши ҳақидаги суриштирувларда швейсариялик олим Уилсон Эдвардснинг хулосаларига асосланган, олим АҚШни ЖССТ фаолиятини сиёсийлаштирганликда айблаганди. Швейцария элчихонаси бу каби хабарларнинг фейк экани, мамлакатда бундай исм-шарифли олимнинг умуман йўқлигини маълум қилди. TJournal нашри мазкур ҳолатнинг тафсилотлари ҳақида маълумот берган.
Хитой нашрларида, ижтимоий тармоқларда тез-тез илмий фикрларидан иқтибослар келтирилаётган Уилсон Эдвардсни қидиряпмиз. Агар сиз ҳаётда бўлсангиз, сиз билан танишишни истардик! Аммо бу каби хабарлар аслида фейк эканлигининг эҳтимоли юқори, биз ижтимоий тармоқлар фойдаланувчиларидан бундай ахборотларни ўчириб ташлашни сўраймиз.Швейцариянинг Хитойдаги элчихонаси баёноти
BBC берган маълумотлар бўйича биолог Уилсон Эдвардснинг сўзларидан CGTN, Shanghai Daily ҳамда Global Times каби нашрлар ҳам иқтибослар келтирган. Масалан, Shanghai Daily биологнинг коронавируснинг Хитойда сунъий равишда яратилгани юзасидан ЖССТ мутахассислари гуруҳининг ҳисоботида тахминийлик ва масалани сиёсийлаштириш борлигидан хавотирда эканлиги ҳақида ёзган.
«АҚШ Хитойга вируснинг келиб чиқиши масаласида ҳужум қилишга шу қадар берилиб кетдики, реал маълумот ва хулосаларга ҳам кўз юммоқда», — дея Эдвардс сўзларини келтирган Хитой нашрлари.
Барча нашрлар олимнинг Facebook’даги саҳифасидаги постларга ҳавола берган. Швейцария элчихонаси биологнинг профили икки ҳафта аввал яратилгани ва унга атиги учта фойдаланувчи обуна бўлганига эътибор қаратган. Постларни бошқаларга улашганлар орасида Хитойнинг Shanghai Daily нашри ҳамда Покистондаги хитойлик дипломат бор.
Швейцария дипломатик ваколатхонаси мамлакат фуқаролари реестрида Уилсон Эдвардс исм-шарифли шахс йўқлигини билдирган. Шунингдек, Швейцарияда бундай одамнинг ҳеч қандай академик мақоласи ҳам нашр қилинмаган.
Twitter фойдаланувчилари аслида ҳаётда йўқ биолог воқеаси бўйича ҳажвий матн ва суратлар билан бўлишишни бошлаган.
«Улар швейцариялик олимга «швейцар» тилида исм бера олишмадими? ЛОЛ», — деб ёзган бошқа бир фойдаланувчи.
«Менинг исмим Уилсон Эдвардс, мени ўғирлаб кетиб Хитойга олиб келишган, мамлакат ҳукумати фуқаролигимни ва исмимни ўзгартирган. Менинг уйга қайтишимга ёрдам берасиз деган умиддаман».
Хитойдаги Швейцария элчихонасининг хабаридан кейин барча ОАВларда биологнинг изоҳлари ўчириб ташланди. Уилсон Эдвардснинг Facebook’даги профили ҳам йўқолиб қолди.
Пандемия бошланганидан буён АҚШнинг айрим расмийлари COVID-19 нинг Ухандаги лабораторияда сунъий йўл билан яратилганини тахмин қилиб келади. Мамлакат собиқ президенти Дональд Трамп ҳам шундай фикрда эди. Шунингдек, АҚШ разведкаси коронавируснинг сунъий тарзда яратилиб, тарқатилганлигининг эҳтимоли ўрганилаётганини билдирган.
2021 йил майда The Wall Street Journal АҚШ мутахассисларининг ахборотларига таяниб, коронавируснинг Ухандаги лабораториядан тарқалиб кетгани ҳақида материал чоп этди. Шу ойнинг ўзида АҚШ президенти Жо Байден мамлакат разведкасига вируснинг келиб чиқиши бўйича маълумотларни тўплаш ишларини кучайтириш тўғрисида кўрсатма берган.
Шундан кейин ЖССТ COVID-19 нинг лабораториядан ташқарига чиқиб кетганини инкор этмади ва коронавируснинг келиб чиқишини текширишнинг иккинчи босқичига тайёргарлик кўриш ишларини бошлаб юборди. Хитой бунга жавобан ташкилотни сиёсийлашганликда айблади ва у билан ҳамкорлик қилмаслигини билдирди.
Изоҳ (0)