Хитой Фаластинни қўллаб-қувватлайди ва Фаластин-Исроил низосини тартибга солишда ёрдамлашади. Бу ҳақда Хитой Халқ Республикаси ташқи ишлар вазири Ван И ўзининг покистонлик ҳамкасби Шоҳ Маҳмуд Қурайший билан телефон орқали суҳбат чоғида айтиб ўтди, деб ёзади «РБК» Хитой Ташқи ишлар вазирлиги сайтига таяниб.
«Хитой ўз қонуний ҳуқуқларининг қайтариб берилиши учун курашаётган Фаластин халқини ҳаққоний иш бўйича қўллаб-қувватлашда, мавжуд муаммоларни сиёсий мулоқот йўли билан тартибга солишда кўмаклашишда давом этади», — дейилади хабарда.
Ван Ининг сўзларига кўра, Хитойнинг фикрича, низони бартараф қилишни икки халқ учун икки давлат концепцияси таъминлашга қодир. Шу муносабат билан БМТ Хавфсизлик Кенгаши Фаластин ва Исроилни ушбу формула асосидаги тинчлик музокараларини иложи борича тезроқ қайта бошлашга чақириши керак, дея маълум қилди Хитой ТИВ.
Икки халқ учун икки давлат концепцияси Исроил давлати билан бир қаторда Иордан дарёси ва Ўрта Ер денгизи оралиғида Фаластин давлатини тузиш йўли билан низога нуқта қўйишни кўзда тутади.
Фаластин-Исроил низосининг 2014 йилдан буён кузатилган энг кучли авж олиши май ойида Исроил ҳукуматининг Қуддусда бир қатор араб оилаларини кўчириб юбориш қароридан кейин бошланди. Бу норозиликларни келтириб чиқарди ҳамда Қуддусда араб намойишчилар ва Исроил полицияси ўртасидаги тўқнашувларга сабаб бўлди.
Вазиятга ҲАМАС аралашди. Исроил унинг полицияни олиб кетиш ҳақидаги талабларини бажармаганидан кейин, гуруҳ ракеталар отишни бошлади. Бунга жавобан Исроил Ғазо секторини ўққа тутди.
Мавзуга доир:
- ҲАМАС ўт очишни бекор қилиш шартларини маълум қилди
- Исроил Ғазога низо бошидан буён энг йирик ҳужумни амалга оширди. 40 дақиқа ичида самолётлар 150 та нишонни ўққа тутди (видео)
- ОАВ: Исроил Мисрнинг Ғазо секторидаги ярашув ҳақидаги таклифини рад этди
- Исроил армияси ҲАМАС ҳаракатининг ички хавфсизлик штабига зарба берди
Изоҳ (0)