Араб давлатлари Исроил армиясининг Иордан дарёси ғарбий соҳилида жойлашган Наблус шаҳрида фаластинликларга қарши уюштирган жазо рейдини қоралаб чиқди.
Саудия Арабистони, Қатар, Бирлашган Араб Амирликлари, Кувайт, Уммон, Миср, Тунис давлатлари Исроил армиясининг Наблусдаги ҳаракатларини қоралади — рейдда 11 фаластинлик ҳалок бўлган, 100 дан ортиқ киши яраланган.
Араб парламенти, Араб давлатлари лигаси ва Форс кўрфазидаги араб давлатлари ҳамкорлик кенгаши Исроилни халқаро ҳуқуқни қўпол равишда бузганликда ва Фаластин ҳудудларида кескинликни кучайтирганликда айблади.
Исроил армиясининг Наблусдаги фаластинликларга қарши рейди
22 февраль куни Исроил мудофаа кучлари оккупация қилинган Ғарбий соҳил шимолидаги Наблус шаҳрида навбатдаги рейд давомида фаластинликларга қарши қурол ишлатди. Босқинда 11 фаластинлик ўлдирилди, 100 дан ортиқ киши яраланди.
Исроил ҳарбийлари шаҳарга бир неча томондан бостириб келган. Улар эски шаҳар ҳудудидаги уйлардан бирини ўраб олгач, тартибсизликлар бошланган.
Фаластин Соғлиқни сақлаш вазирлигининг маълум қилишича, ярадорлар яқин атрофдаги шифохоналарга етказилган. Олти нафар ярадорнинг аҳволи оғир деб баҳоланмоқда. Вазирликнинг қайд этишича, 2023 йил бошидан буён исроилликлар томонидан ўлдирилган фаластинликлар сони 62 нафарга етган.
Фаластиннинг WAFA ахборот агентлигига кўра, жароҳатланганлар орасида икки журналист ҳам бор.
Айни пайтда Исроил армияси Нублусдаги Эски шаҳар ҳудудида рейд ўтказилгани ҳақидаги маълумотни тасдиқлади. Тель-Авив даъво қилишича, ҳарбийлар уч нафар гумонланувчи бўлган уйни ўраб олган ва уларни “зарарсизлантирган”. Исроил оммавий ахборот воситалари Фаластиннинг қасос олиш эҳтимоли туфайли мамлакатда хавфсизлик кучайганини хабар қилди.
Фаластин маъмурияти Исроил томонидан содир этилган жиноятлар юзасидан Фаластин халқини халқаро ҳимоя қилиш учун БМТ Хавфсизлик Кенгаши, Араб давлатлари лигаси ва Ислом ҳамкорлик ташкилотини фавқулодда йиғилиш ўтказишга чақирди.
Изоҳ (0)