Германиянинг “Fortuna Дюссельдорф” клуби исроиллик ҳужумчи Шон Вайсманни ўз таркибига қўшиб олмоқчи эди. Бироқ футболчининг Ғазо сектори бўйича ижтимоий тармоқларда билдирган фикрлари сабаб трансфер амалга ошмай қолиши мумкин. Бу ҳақда Германиянинг Bild нашри хабар берди.
Манбага кўра, Вайсман 3 август куни клуб учун тиббий кўрикдан ўтиши керак эди. Аммо 2023 йил 7-октябрь куни ҲАМАС ҳужумидан сўнг футболчи томонидан ёзилган изоҳлар жамоатчилик эътиборига тушди. Вайсман бу постларни кейинчалик ўчириб ташлаган ҳамда уларни ҳиссиёт таъсирида ёзганини тан олиб, қилган ишидан афсусдалигини билдирган.
Вайсман ижтимоий тармоқларда “Ғазони ер юзидан йўқ қилиш керак” деган чақириқ постига лайк босган. Шунингдек, “нега ҳануз Ғазога 200 тонна бомба ташланмади?” деган жумла остига изоҳ қолдирган. Қолаверса, бунга ўхшаш бошқа постлар ҳам футболчи томонидан қўллаб-қувватлангани қайд этилган.
Ушбу ҳаракатлар Германиядаги Фаластин фаоллари ва оддий футбол ишқибозларининг жиддий норозилигига сабаб бўлди. Ижтимоий тармоқларда Вайсман трансферига қарши петициялар эълон қилиниб, клуб раҳбариятига босим кучаймоқда.
Юзага келган вазиятга изоҳ берган Вайсман қуйидагиларни таъкидлади:
Мен 7-октябрь воқеаларидан ҳануз мотам тутаётган халқ вакилиман. Танқидни тўғри қабул қиламан, бироқ ҳолатга бир томонлама баҳо берилаётганидан афсусдаман. Инсон, исроиллик ва спортчи сифатида мен икки томонда ҳам бегуноҳ инсонларга зиён етишига қаршиман Аммо “лайклар” ва изоҳ сабаб мендан нафратланишингиз адолатдан эмас.
Маълумот учун, 29 ёшли Шон Вайсман ўтган мавсум Испаниянинг “Вальядолид” клубида ўйнаган. Футболчи ушбу жамоа сафида жами 31 та ўйинда майдонга тушиб, ўз ҳисобига 4 та гол ва 2 та голли узатма ёздириб қўйган. Transfermarkt портали Шоннинг қийматини 1,2 миллион еврога баҳоламоқда.
Изоҳ (0)