Покистоннинг тоғли Кўҳистон минтақасида 28 йил олдин бедарак йўқолган эркак жасади эриётган музлик орасидан топилди. Бу ҳақда BBC хабар берди.
Маълум қилинишича, маҳаллий чўпон мамлакат шарқидаги Ладй водийсида жасадни тасодифан кўриб қолган. Жасад шунчалик яхши сақланганки, унинг кийимлари ҳам бутун бўлган. Ёнидан топилган шахсни тасдиқловчи гувоҳномадан унинг исми Насируддин экани аниқланган. Полиция унинг 1997 йил июнида қор бўрони чоғида музлик ёриғига тушиб кетиб, бедарак йўқолганини таъкидламоқда.
Сўнгги йилларда ушбу ҳудудда қор ёғиши камайиб, музликлар бевосита қуёш нури таъсирида тезроқ эрий бошлаган. Мутахассислар бу ҳолат иқлим ўзгариши музликлар эришини тезлаштираётганининг яққол исботи эканини айтмоқда.
“Кўрганларимга ишонолмадим, жасад бутун эди, кийимлари ҳам йиртилмаган”, деди чўпон Омар Хон.
Насируддиннинг акаси Катируддиннинг сўзларига кўра, улар ўша куни от миниб Ладй водийга келган ва туш пайти укаси ғорга кириб кетган. Орадан вақт ўтиб, қайтиб чиқмагач, у ёрдам сўраб бошқаларга мурожаат қилган, аммо қидирув ишлари натижа бермаган.
Мутахассислар фикрича, одам танаси музлик ичига тушганда, кескин совуқ уни тез музлатиб қўяди ва чириш жараёни содир бўлмайди. Намлик ва кислороднинг йўқлиги эса жасадни узоқ вақт давомида мумиёланган ҳолда сақлаб қолади.
Изоҳ (0)