Хабарингиз бор, Туркиянинг жануби-шарқий вилоятларида содир бўлган зилзила салкам 32 минг аҳолининг “ёстиғини қуритди”. Юз минглаб инсонларнинг оғир тан жароҳати олишига сабаб бўлди. Турк халқи бошига тушган воқеалар нафақат хорижлик ўқувчилар, ўзбек ўқувчиларининг ҳам қизиқишини уйғотгач, “Дарё” журналисти Отабек Қўлдошев 14 февраль куни Туркиянинг Истанбул шаҳри орқали Газиантеп вилоятига етиб борди ва ўзбек ўқувчилари учун қизиқ бўлган воқеани айни ҳудуднинг ўзида бўлиб, ёритишга уринди.
Дастлаб Газиантеп вилояти марказида бўлган журналист шаҳар марказидаги кўп қаватлар уйлар ҳам қулаб тушганига, бу орқали минглаб инсонларга зарар етганига гувоҳ бўлди.
Маълум бўлишича, Газиантеп Туркиядаги мавжуд 81 та вилоятларнинг бири бўлиб, зилзиладан катта зарар кўрган ҳудуд бўлган.
“Бизнинг вилоятимиздаги Нурдағи ҳамда Ислаҳия туманлари зилзиладан энг кўп зарар кўрган ҳудудлар бўлиб, Нурдағи шаҳри деярли вайрон бўлган. Бу шаҳарда 60 минг нафар аҳоли истиқомат қиларди. Шу сабаб президент Ражап Тоййиб Эрдўған бу шаҳар текисланиб, ўрнига бир йилда янги шаҳар қурилишини билдирди. Бундан нафақат биз масъуллар, аҳоли вакиллари ҳам жудаям мамнун бўлдик”, — дейди “Дарё” журналистига мазкур маълумотларни тўплашда кўмаклашган масъуллардан бири Жафер Йилмаз.
Газиантеп шаҳар ҳокимияти ёнғин хавфсизлиги бошқармаси бошлиғи Жафер Йилмазнинг маълумот беришича, Туркияда содир бўлган зилзиланинг кучидан 10 та вилоятда яшовчи 13 миллион кишидан ортиқ аҳоли зарар кўрган.
“Шу 10 та вилоятда яшовчи 13 миллиондан ортиқ аҳоли зилзиладан зарар кўрди. Яқинларини йўқотди, мулкидан айрилди. Бироқ давлатимиз меҳрибон ва уларни қўллаб-қувватламоқда. Янги қурилажак шаҳарнинг барча харажатлари давлат ҳисобидан амалга оширилади ва уй-жойидан айрилган қардошларимизга янги уйлар тортиқ қилинади”, — дейди Жафар Йилмаз.
“Дарё” журналисти Отабек Қўлдошевнинг кузатувларига кўра, Нурдағи шаҳридаги кўп қаватли уйларнинг деярли барчаси қулаган. Қуламаганларида эса катта ёрилишлар пайдо бўлган. Шу сабаб бу шаҳар аҳолиси уйларини тарк этмоқда.
“Дарё” интернет нашри сайт журналистининг ахборот тўплашига кўмаклашаётган Туркия Республикаси президенти ҳузуридаги Коммуникациялар бошқармасининг Тошкент элчихонаси Коммуникациялар бўйича маслаҳатчиси Ҳамди Туршужуга, Газиантеп шаҳар ҳокимияти ёнғин хавфсизлиги бошқармаси бошлиғи Жафер Йилмаз ва мудурларга ўз миннатдорлигини билдиради.
“Дарё” Туркиядаги зилзила ўчоқларидан туркум материаллар эълон қилишда давом этади.
Изоҳ (0)