Туркияда ўрмон ёнғинлари ортидан сув тошқини бошланди, деб ёзмоқда Reuters.
Ғайриоддий кучли ёмғир Туркиянинг Қора денгиз соҳилида сув тошқинини келтириб чиқарди. Оқибатда кўприк бузилиб кетди, бир қанча қишлоқлар электрсиз қолди.
Сув тошқинлари Синоп, Бартин, Каравук ва Кастамону вилоятларига таъсир кўрсатди. Хусусан, Туркия шимолидаги Бартин вилоятида кўприк қулаб тушди. Фавқулодда ҳолат натижасида 13 киши жароҳат олди, бир киши юрак хуружидан вафот этди. Бундан ташқари, қутқарувчилар тошқинда йўқолган 80 ёшли аёлни қидирмоқда.
Бош вазирнинг Фавқулодда вазиятлар ва табиий офатларга қарши кураш бошқармаси (АФАД) маълумотларига кўра, 12 та қишлоқда электр таъминоти узилган. Биноларнинг биринчи қаватларини ҳам сув босган, шунингдек, сув машиналарни оқизиб кетган.
Бартиндан 240 километр узоқликдаги Синоп вилоятида сув тошқини туфайли бир уй қулаб тушди. Вилоятнинг табиий офатдан зарар кўрган ҳудудларида кўплаб уйлар ва корхоналар сув остида қолди. Расмийларнинг маълум қилишича, ушбу ҳудуддаги давлат шифохонаси эҳтиёт чораси сифатида эвакуация қилинган.
10 август куни Ойдин вилоятида кучли ёғингарчиликдан кейин кўплаб уйлар ва корхоналарни сув босган. Бундан ташқари, вилоят ва Истанбул ўртасидаги йўлнинг бир қисми ювилиб кетган, бульдозерлар ёрдамида уйида қолиб кетган 20 киши қутқариб олинган.
Шунингдек, Кастамону вилоятида кутилмаган ва кучли ёғингарчилик оқибатида биноларнинг ертўлалари сув остида қолган. Кастамону шаҳар марказини Инеболу тумани билан боғлайдиган йўл тўсиб қўйилган. Ҳукумат одамларни минтақанинг турли жойларида сув тошқини ва кўчкилар юз бериши ҳақида огоҳлантирди.
Маълумотларга кўра, ҳозирда қидирув-қутқарув ишлари давом этмоқда. Сув босган уйлардаги аҳоли эвакуация қилинмоқда, улар асосан пуфлама қайиқларда олиб чиқилмоқда.
Мудофаа вазирлиги Синоп ва Кастамонидаги тошқинлар туфайли ҳарбий-ҳаво кучларига тегишли иккита АC-532 вертолёти сафарбар қилинганини маълум қилди.
Июль ойининг иккинчи ярмида ҳам Туркияда сув тошқини юз берганди. Мамлакат шимоли-шарқидаги Ризо ва Артвин вилоятларида кучли ёмғирлар туфайли сув тошқинлари келиб чиққан.
Июль охирида Туркия жанубида иссиқ ва қуруқ ҳаво шароитида ўрмон ёнғинлари бошланди. Ҳукумат тақдим этган сўнгги маълумотларга кўра, Анталя вилоятидаги Манавгат курорт шаҳрида етти киши ёнғин қурбони бўлган. Мармарисда яна бир киши ҳалок бўлган. Жабрланганларнинг умумий сони 864 кишига етди.
Маҳаллий ОАВ хабарига кўра, «Олов болалари» террорчилик ташкилоти ўрмон ёнғинлари учун жавобгарликни ўз зиммасига олган. Туркия президенти Ражаб Тоййиб Эрдўғон ёнғинлардан вайрон бўлган ҳудудларни тиклаш учун киши бошига уч тупдан кўчат экишга ваъда берди.
Изоҳ (0)