Жанубий Корея полицияси умумий йиғилишда президент Юн Сок Ёлни учинчи марта ҳибсга олиш режаларини муҳокама қилди.
Бу ҳақда Yonhap агентлиги маълум қилди.
Икки соат давом этган учрашувда ҳибсга олиш санасини 15 январга белгилаш имконияти муҳокама қилинди. Бу сафарги ҳибсга олиш жараёнига жами минг нафаргача терговчи ва полиция ходимлари жалб этилиши мумкинлиги аввалроқ хабар қилинган эди.
Жанубий Корея оммавий ахборот воситалари президентни ҳибсга олишга навбатдаги уриниш шу ҳафтанинг иш кунларида содир бўлиши мумкинлигини тахмин қилган эди.
Ўз навбатида, президент хавфсизлик хизмати баёнот бериб, қўриқланадиган ҳудудга кирганларга чегарани бузувчи сифатида қаралиши ҳақида огоҳлантирган.
“Қўриқланадиган ҳудудга тегишли рухсатсиз кириш қонун бузилиши ҳисобланади ва ҳуқуқни муҳофаза қилиш органларининг қонунга зид хатти-ҳаракатлари хавфсизлик қоидалари ҳамда қонун ҳужжатларига мувофиқ кўриб чиқилади”, дейилади хизмат хабарида.
Сеулнинг Ғарбий округ суди 31 декабрь куни президент Юн Сок Ёлни ҳибсга олиш учун ордер берганди.
Бунга лавозимидан четлатилган президент қўзғолонга раҳбарлик қилиш ва ҳокимиятни суиистеъмол қилишда айбланиб, уч марта сўроққа келмагани сабаб бўлди.
Бу Жанубий Корея тарихида амалдаги давлат раҳбарига ҳибсга олиш учун ордер берилган биринчи ҳолатдир. Yonhap хабарига кўра, тинтув учун ҳам ордер берилган.
Изоҳ (0)