Корея сериаллари бутун дунё бўйлаб миллионлаб томошабинларнинг меҳрини қозонди. Агар сиз ҳали драмаларни томоша қилмаган бўлсангиз, энди улар билан танишиш вақти келди! Сиз учун ҳаётимиз аслида нақадар гўзал эканини ёдга солувчи эзгулик ва позитивга тўла ёрқин корейс драмаларини тўпладик.
“Ярқираган тарвуз” (2023)
Мактабдаги юқори синф ўқувчиси Ингйўл эшитиш қобилияти заиф инсонлар оиласида туғилиб ўсди. У ота-онаси ва акаси билан имо-ишоралар тилида сўзлашади. Болалигидан Ингйўл оила аъзоларига ҳамма нарсада, жумладан, одамлар билан мулоқотда ёрдам берадиган итоаткор, намунали ўғил бўлишга одатланган. Бироқ Ингйўл жуда яхши эшитиш қобилиятига эга — у ҳатто қор парчаларининг ерга тушишини ҳам сезади. Шу туфайли мусиқада ҳам истеъдодли. Ингйўл гитара чалишни яхши кўради, лекин ўзининг севимли машғулоти ҳақида оиласига айтмайди ва тунда яширинча қаҳвахоналарда чиқиш қилади. Бир куни отаси бундан хабар топади ва уйда жанжал кўтарилади. Ингйўл кечаси шаҳар бўйлаб айланиб юрганда ғайриоддий мусиқа дўконига кўзи тушади. Ушбу дўкон уни 1995 йилга олиб боради. Ўтмишда Ингйўл отаси билан учрашади ва ёшликда отаси яхши эшитган, гапирган ва ҳатто мусиқий гуруҳ аъзоси бўлганини билиб қолади.
“Самдаллига хуш келибсиз” (2023)
Воқеалар Чежудо оролида бўлиб ўтади. Бош қаҳрамонлар Самдал ва Ёнпил болаликдан дўст тутинган. Ёнпил ҳар доим ўзи туғилиб ўсган ватанини яхши кўрган бўлса, Самдал улғайиши билан Сеулга кўчиб ўтишни орзу қиларди ва у мақсадига етди ҳам. Самдал ва унинг опа-сингиллари пойтахтга кўчиб кетади. Улар ҳатто исмларини ўзгартириб, мода соҳасида карьера қуради. Ёнгпил эса ўз ишига содиқ метеорологга айланди. Кунларнинг бирида Самдалнинг қайлиғи унга қўл остидаги ходими билан хиёнат қилганини билиб қолди. Бунинг устига ўша аёл Самдалнинг карьераси ва обрўйига путур етказишга уринади. Жанжалдан сўнг Самдал ватанига қайтишга ва Чежудода ўзининг болаликдаги дўсти билан учрашишга қарор қилди.
“Кайфиятни кўтаринг” (2022)
До Хеи пойтахтдаги нуфузли университет талабаси. У ўта ночор оилада вояга етди. Шунинг учун у онаси ва укасини таъминлайди, барча молиявий масъулиятни ўз зиммасига олади. Пул топиш ташвиши унга ўқиш ёки шахсий орзуларини рўёбга чиқаришдан ҳам муҳимроқ эди. Хеини қўллаб-қувватловчилар рақс гуруҳига таклиф қилишганда аввалига буни рад этади, чунки у қимматли вақтини беҳуда сарфлашни истамайди. Аммо кейинроқ у рақс гуруҳи раҳбари Чонга ёрдам беришга қарор қилади ва черлидерлар тўгарагига қатнай бошлайди.
“Олисдаги яшил баҳор” (2021)
Е Жун исмли биринчи курс талабаси университетдаги энг машҳур ва келишган йигит. Унинг дид билан кийиниши, чиройли табассуми ва ажойиб характери атрофидагиларни доим ўзига жалб қилиб келган. Е Жун бошқалар билан осонгина тил топишса-да, чин дўстлари йўқ. Бадавлат оиладан бўлган ва доимо кулиб турадиган йигитнинг қалбида эса аслида доимо ўзини кўз-кўз қилишга мажбур бўлган жуда заиф бола яширинган.
“Ҳеч нарса қилишни истамайман” (2022)
Ёрим исмли қизнинг бутун умри югуриш марафонига ўхшайди: аввал университетга кириш учун мактабни аъло баҳоларга тугатиш керак эди. Кейин эса қизил диплом олиш учун тиришқоқ талаба бўлиш. Эндиликда у ғилдирак ичида югуриб кетаётган сичқондек ишга шошади. Бунинг устига у ёлғиз, дўстлари ҳам йўқ. Қайлиғи қизни яқинда ташлаб кетди. Ёримнинг ягона дўсти унинг онаси эди. Аммо у ҳам бахтсиз ҳодисадан вафот этди. Шундан сўнг Ёрим ҳаёти қанчалик маъносиз эканлигини тушуниб етади, иши ва бошқа барча нарсадан воз кечиб, қишлоқда яшашга қарор қилади.
“Шифокор инқирозга юз тутди” (2024)
Чону ва Ҳанил бир синфда ўқиган ва ҳозирда улар шифокор бўлиб ишлайди. Чону кўплаб муваффақиятли операцияларни бажарган ва машҳур пластик жарроҳ. Ҳанил эса профессор бўлишни орзу қиладиган анестезиолог. Аммо иккисининг ҳаёти бирдан ўзгариб кетди: Чонунинг бемори операция вақтида тўсатдан вафот этади ва унинг карьераси бир кунда таназзулга учрайди. Ҳанил эса ишда адолатсизликка дуч келади. Омадсиз кунларни бошидан кечираётган бу икки шифокор тақдир тақозоси билан учрашиб қолади ва мактаб йилларида рақиб бўлган синфдошлар эндиликда бир-бирига ёрдам беришга қарор қилади.
Изоҳ (0)